اداکارہ اور پنجاب کنگز کی شریک مالک پریتی زنٹا حال ہی میں سوشل میڈیا پر ایک سوال پر برہم ہو گئیں، جب ایک صارف نے ان سے آسٹریلوی کرکٹر گلین میکسویل سے شادی نہ کرنے سے متعلق سوال کیا۔
یہ واقعہ اس وقت پیش آیا جب پریتی زنٹا نے اپنے سوشل میڈیا اکاؤنٹ پر ایک سوال و جواب سیشن رکھا۔ ایک صارف نے پوچھا:"میڈم، میکسویل کی آپ سے شادی نہیں ہوئی، اس لیے وہ آپ کی ٹیم کی طرف سے اچھا نہیں کھیلتا تھا؟"اس سوال پر پریتی زنٹا نے شدید ردِعمل دیا اور جواب دیا:"کیا آپ یہ سوال تمام ٹیموں کے مرد مالکان سے بھی پوچھیں گے؟ یا یہ امتیازی سلوک صرف خواتین کے ساتھ ہوتا ہے؟"انہوں نے مزید کہا:"میں جانتی ہی نہیں کہ خواتین کے لیے کارپوریٹ ماحول میں کام کرنا کتنا مشکل ہوتا اگر میں خود کرکٹ کے میدان میں قدم نہ رکھتی۔"پریتی زنٹا نے واضح کیا کہ وہ 18 سال سے کرکٹ اور اس ٹیم کے لیے محنت کر رہی ہیں اور ایسی صنفی قیاس آرائیوں سے گریز کیا جانا چاہیے۔
انہوں نے کہا:"مجھے وہ عزت دیجیے جس کی میں حقدار ہوں، اور اس طرح کے تبصروں سے پرہیز کیجیے۔"پریتی زنٹا کی ٹیم پنجاب کنگز نے 11 میچوں میں 7 فتوحات حاصل کی ہیں اور 15 پوائنٹس کے ساتھ پوائنٹس ٹیبل پر تیسرے نمبر پر ہے۔یہ واقعہ ایک مرتبہ پھر اس بات کی نشاندہی کرتا ہے کہ خواتین کو کھیلوں اور کارپوریٹ دنیا میں صنفی تعصبات کا سامنا کرنا پڑتا ہے، چاہے وہ کتنی ہی کامیاب کیوں نہ ہوں۔
