ڈاکٹر عافیہ صدیقی کے رہائی اور وطن واپسی سے متعلق کیس میں اہم پیش رفت سامنے آئی ہے، جہاں ان کے امریکی وکیل کلائیو اسمتھ نے پاکستان آنے کا فیصلہ کر لیا ہے۔
یہ فیصلہ کیس میں مزید پیش رفت کے لیے نہایت اہمیت کا حامل سمجھا جا رہا ہے۔اسلام آباد ہائیکورٹ میں جسٹس سردار اعجاز اسحاق خان نے کیس کی سماعت کی، تاہم نئے تعینات ہونے والے ایڈیشنل اٹارنی جنرل عمر اسلم عدالت میں پیش نہ ہو سکے۔ دورانِ سماعت، وکیل عمران شفیق ایڈووکیٹ نے عدالت کو آگاہ کیا کہ کلائیو اسمتھ 4 مئی کو پاکستان پہنچیں گے، اور اس کے بعد مشاورت ضروری ہے۔عدالت نے عمران شفیق کی استدعا منظور کرتے ہوئے، وکیل کو وقت دینے کا فیصلہ کیا۔ اس پر عدالت نے اگلی سماعت 6 مئی کو مقرر کرنے کی تجویز دی، جس پر لاء افسر نے بھی کسی قسم کے اعتراض سے انکار کرتے ہوئے اتفاق کیا۔
یوں اسلام آباد ہائیکورٹ نے ڈاکٹر عافیہ صدیقی سے متعلق کیس کی سماعت 6 مئی تک ملتوی کر دی ہے۔ اس موقع پر عدالت نے وزارت خارجہ کے حکام اور دیگر قانونی نمائندوں کو آئندہ سماعت میں تیاری کے ساتھ پیش ہونے کی ہدایت بھی دی۔یہ پیش رفت اس حوالے سے نہایت اہم ہے کہ کلائیو اسمتھ کی پاکستان آمد، عافیہ صدیقی کی رہائی کے معاملے کو بین الاقوامی سطح پر مزید تقویت دے سکتی ہے، اور قانونی حکمتِ عملی کے حوالے سے اہم مشاورت اور پیش رفت متوقع ہے۔
