دنیا میں ٹرسٹ بنانے پر نوبل پرائز ، عمران خان کو شرمندہ کیا جا رہاہے: وقاص اکرم

القادر ٹرسٹ کا پیسا بانی پی ٹی آئی اور بشریٰ بی بی کے اکاؤنٹ میں نہیں آیا،مرکزی سیکرٹری اطلاعات پی ٹی آئی
پشاور(مانیٹرنگ ڈیسک)پاکستان تحریک انصاف کے مرکزی سیکرٹری اطلاعات شیخ وقاص اکرم نے کہا ہے کہ کسی بھی دوسرے ملک میں ٹرسٹ بنانے پر نوبل پرائز دیا جاتا ہے، یہاں فلاحی کام کرنے والوں کو شرمندگی کا سامنا کرنا پڑ رہا ہے۔پشاور میں پریس کانفرنس کرتے ہوئے ان کا کہنا تھا کہ القادر ٹرسٹ سے کسی نے ذاتی فائدہ نہیں اٹھایا، القادر ٹرسٹ کا پیسا بانی پی ٹی آئی اور بشریٰ بی بی کے اکاؤنٹ میں نہیں آیا، نیب نے جو گواہان پیش کیے انہوں نے ثبوت دے دیے کہ بانی پی ٹی آئی کے اکاؤنٹ میں پیسے نہیں آئے، 190 ملین پیسے پاکستان آئے اچھی بات ہے، فلاحی کام کرنے والوں کو آج شرمندگی کا سامنا کرنا پڑ رہا ہے۔ان کا کہنا تھا کہ القادر ٹرسٹ میں بانی پی ٹی آئی اور بشریٰ بی بی کا کوئی تعلق نہیں، القادر ٹرسٹ میں خان صاحب کی بریت ہونی چاہیے، بانی پی ٹی آئی نے واضح کردیا کہ میں جھکوں گا نہیں، ہائی کورٹ میں گملے توڑنے کا کیس بھی بانی پی ٹی آئی پر بنا دیا گیا۔