بانی کی صحت کیساتھ طبی دہشتگردی ‘عدالتیں انصاف نہیں کر سکتیں تو انہیں تالے لگنے چاہئیں سہیل آفریدی

 آج آنکھ کے ساتھ یہ کیا تو یہ کل کچھ بھی کر سکتے ہیں،  اسلام آباد ہائی کورٹ کو چاہیے کیسوں کی سماعت کرے ‘اسلام آباد میں دہشت گردی ہوئی بلوچستان میں حالت برے ہیں
 ملک کے حالات بدترین ہو رہے ہیں اور یہ سسٹم ایک بندے کو جھکانے میں لگا ہے، دوست ممالک اپنا قرضہ واپس لیں تو آپ کا ڈالر 400 روپے ہو جائیگا:میڈیا سے گفتگو
اسلام آباد(آئی این پی )وزیر اعلی خیبر پختونخوا سہیل آفریدی نے کہا ہے سپرنٹنڈنٹ اڈیالہ جیل عبدالغفور انجم نے بانی کی صحت کے ساتھ طبی دہشت گردی کی ہے۔سپریم کورٹ کے باہر میڈیا سے گفتگو کرتے ہوئے انہوں نے کہا کہ اڈیالہ جیل میں عبدالغفورانجم ہے، ان کی سرپرستی پنجاب کی جعلی حکومت کر رہی ہے۔سہیل آفریدی کا کہنا ہے کہ بانی کو اس حد تک ٹارچر کیا گیا کہ اہل خانہ تک کو نہ بتایا گیا، یہ جعلی حکومت کی رپورٹ ہے کہ بانی پی ٹی آئی کی بینائی 15 فیصد تک آئی ہے۔انہوں نے کہا کہ پنجاب کی جعلی حکومت کی سرپرستی میں جو ہوا اس سے ان کے عزائم سامنے آرہے ہیں، آج اگر آنکھ کے ساتھ یہ کیا تو یہ کل کچھ بھی کر سکتے ہیں۔وزیر اعلی خیبر پختونخوا کا کہنا ہے کہ ماڈل ٹائو ن اور 9 مئی ہمیں یاد ہے، مریدکے میں جو ہوا وہ یاد ہے، ان کے سامنے جان کی کوئی حیثیت نہیں یہ خون کے پیاسے ہو گئے ہیں۔سہیل آفریدی نے کہا کہ اسلام آباد ہائی کورٹ کو چاہیے کہ کیسز سماعت کیلئے  مقرر کرے، اگر عدالتیں انصاف نہیں کر سکتیں تو انہیں تالے لگنے چاہئیں۔ان کا کہنا ہے کہ اسلام آباد میں دہشت گردی ہوئی بلوچستان میں حالت برے ہیں، ملک کے حالات بدترین ہو رہے ہیں اور یہ سسٹم ایک بندے کو جھکانے میں لگا ہے، اگر دوست ممالک اپنا قرضہ واپس لیں تو آپ کا ڈالر چار سو روپے ہو جائے گا۔