پاکستان انٹرنیشنل ایئرلائنز (پی آئی اے) کی برطانیہ کے لیے براہ راست پروازوں کی بحالی سے متعلق اہم پیشرفت سامنے آئی ہے۔
ذرائع کے مطابق، برطانوی سیفٹی کمیٹی کا اجلاس 12 مارچ کو طلب کر لیا گیا ہے، جس میں پی آئی اے کی پروازوں کی بحالی کے حوالے سے جائزہ لیا جائے گا۔ اجلاس میں برطانوی سول ایوی ایشن اتھارٹی اور محکمہ ٹرانسپورٹ کی ٹیم پی آئی اے اور پاکستان سول ایوی ایشن کے حالیہ آڈٹ کی رپورٹ پیش کرے گی۔اگر برطانوی سیفٹی کمیٹی نے اجازت دی تو پی آئی اے کو برطانیہ کے لیے براہ راست پروازوں کی بحالی کی منظوری مل جائے گی۔ یاد رہے کہ جولائی 2020 میں پی آئی اے پر برطانیہ میں پروازوں پر پابندی عائد کر دی گئی تھی۔پی آئی اے انتظامیہ کو امید ہے کہ یورپی ممالک میں پروازوں کی بحالی کے بعد برطانیہ میں بھی آپریشن کی بحالی کی اجازت مل جائے گی۔ اسی حوالے سے، پی آئی اے نے لندن، مانچسٹر اور برمنگھم کے لیے فوری پروازوں کے آغاز کا پلان بھی تیار کر لیا ہے۔مزید برآں، پی آئی اے کی دو رکنی ٹیم حال ہی میں برطانیہ میں فلائٹ آپریشن کی تیاریوں کا جائزہ لینے کے بعد پاکستان واپس پہنچ چکی ہے۔ انتظامیہ کی جانب سے تمام ضروری اقدامات مکمل کر لیے گئے ہیں، اور اب حتمی فیصلہ برطانوی حکام کے اجلاس کے بعد متوقع ہے۔
