عوام اور میرا پیار کا رشتہ بعض لوگوں سے برداشت نہیں ہوتا:مریم نواز

وزیر اعلیٰ پنجاب مریم نواز نے لاہور میں جشن اسٹیم پنجاب کی تقریب میں شرکت کی اور باصلاحیت طلبا میں انعامات تقسیم کیے۔

اس موقع پر انہوں نے کہا کہ "عوام اور میرا پیار کا رشتہ ہے، لیکن لوگوں سے یہ برداشت نہیں ہوتا۔"

5 ہزار اسکولوں میں اسٹیم مقابلے
تقریب میں بتایا گیا کہ پنجاب کے 5 ہزار اسکولوں میں اسٹیم (STEM) مقابلوں کا انعقاد کیا گیا، جن میں 8 ہزار طلبا اور 14 ہزار اساتذہ نے حصہ لیا۔ وزیر اعلیٰ نے ان باصلاحیت طلبا کی کارکردگی کو سراہتے ہوئے کہا کہ "یہ بچے ہمارا فخر ہیں اور ان کی حوصلہ افزائی ضروری ہے۔ طلبا کو صحت مندانہ سرگرمیوں میں مصروف رکھنا چاہیے، تاکہ ان کی صلاحیتوں کو مزید نکھارا جا سکے۔"

1100 طلبا کو لیپ ٹاپ دینے کا اعلان
وزیر اعلیٰ نے اعلان کیا کہ مقابلے میں نمایاں کارکردگی دکھانے والے 1100 طلبا کو لیپ ٹاپ دیے جائیں گے۔ انہوں نے کہا کہ "طلبا کے بڑے بڑے خواب ہیں، ہمیں انہیں تعمیری سرگرمیوں میں مصروف رکھنا ہوگا، تاکہ وہ اپنے گولز حاصل کر سکیں، اور ہم ان کی ہر ممکن سپورٹ کریں گے۔"

تعلیمی اداروں کی اپ گریڈیشن اور زبانوں پر عبور کی ضرورت
وزیر اعلیٰ مریم نواز نے مزید کہا کہ پنجاب میں اسکولز اور لیبز کو جدید خطوط پر استوار کیا جا رہا ہے، تاکہ طلبا کو معیاری تعلیمی سہولیات فراہم کی جا سکیں۔ انہوں نے اس بات پر زور دیا کہ "دنیا سے مقابلہ کرنے کے لیے انگریزی سمیت دیگر زبانوں پر عبور حاصل کرنا ضروری ہے، تاکہ ہمارے طلبا بین الاقوامی سطح پر بھی نمایاں کارکردگی دکھا سکیں۔"

ہونہار اسکالرشپس کی رقم میں اضافہ
مریم نواز نے اعلان کیا کہ پنجاب میں 30 ہزار مستحق طلبا کو میرٹ پر ہونہار اسکالر شپس دی جا چکی ہیں اور ان کی رقم 30 ہزار روپے سے بڑھا کر 50 ہزار روپے کر دی گئی ہے۔تقریب کے اختتام پر وزیر اعلیٰ نے کہا کہ "پاکستان کے باصلاحیت بچے پوری دنیا میں ملک کا نام روشن کرسکتے ہیں، ہمیں ان کی مکمل حوصلہ افزائی کرنی چاہیے۔"