وزیر اطلاعات پنجاب عظمیٰ بخاری نے پاکستان تحریک انصاف (پی ٹی آئی) پر احتجاج سے متعلق مبینہ جعلی ویڈیوز پھیلانے کا الزام عائد کرتے ہوئے کہا ہے کہ جامشورو میں بوائلر کی پرانی ویڈیو کو پشاور کے احتجاج سے منسوب کیا گیا، جبکہ بھارتی شہری اشوک سوان نے جنتر منتر پر احتجاج کی ویڈیو کو اسلام آباد کے احتجاج کی ویڈیو بنا کر پیش کیا۔
عظمیٰ بخاری کا کہنا تھا کہ پی ٹی آئی کی جانب سے احتجاج سے متعلق شیئر کی گئی ویڈیوز کی حقیقت سامنے آ گئی ہے۔ انہوں نے طنزیہ انداز میں کہا کہ جعلی قیادت، جعلی انقلاب اور جعلی احتجاج پیش کیا جا رہا ہے۔ ان کا مزید کہنا تھا کہ اگلی بار چاند پر بھی جلسہ کروا دینا اور اس کے لیے ناسا کی ویڈیو استعمال کر لینا۔وزیر اطلاعات پنجاب نے خیبرپختونخوا حکومت کو بھی تنقید کا نشانہ بنایا۔ ان کا کہنا تھا کہ جس صوبائی حکومت کے زیرِ سایہ دہشت گرد محفوظ ہوں، پولیس نہتی ہو اور عوام کو ان کے رحم و کرم پر چھوڑ دیا جائے، وہاں ایمرجنسی ہی لگتی ہے۔عظمیٰ بخاری نے مزید کہا کہ جو وزیراعلیٰ قومی ترانے اور قومی پرچم کے احترام سے عاری ہو، وہ قابلِ نفرت ہوتا ہے۔ انہوں نے سوال اٹھایا کہ پی ٹی آئی کی حکومت نے 13 سال کے دوران خیبرپختونخوا کو کیا دیا؟ان کے مطابق صوبے کے عوام کے ساتھ پی ٹی آئی حکومت کا سلوک واضح ہے۔ عظمیٰ بخاری کے یہ بیانات پی ٹی آئی کے احتجاج، سوشل میڈیا پر گردش کرنے والی ویڈیوز اور خیبرپختونخوا کی سیاسی و سیکیورٹی صورتحال سے متعلق جاری سیاسی تنقید کے تناظر میں سامنے آئے ہیں۔
