پاکستانی لیفٹ آرم اسپنر نعمان علی نے ٹیسٹ کرکٹ میں شاندار کارکردگی دکھاتے ہوئے سابق اسپنرز ثقلین مشتاق اور دانش کنیریا کا ریکارڈ پیچھے چھوڑ دیا ہے۔
تفصیلات کے مطابق بنگلادیش کے خلاف پہلے ٹیسٹ کی دوسری اننگز میں نعمان علی نے 3 وکٹیں حاصل کر کے اپنے ٹیسٹ کیریئر کی 100 وکٹیں مکمل کر لیں۔ یہ سنگ میل انہوں نے اپنے 22ویں ٹیسٹ میچ میں عبور کیا، جس کے بعد وہ پاکستان کی جانب سے تیز ترین 100 ٹیسٹ وکٹیں حاصل کرنے والے اسپنرز کی فہرست میں تیسرے نمبر پر آگئے ہیں۔پاکستان کرکٹ ٹیم کے مطابق اس فہرست میں پہلے نمبر پر یاسر شاہ ہیں جنہوں نے صرف 17 میچز میں 100 وکٹیں مکمل کیں، جبکہ دوسرے نمبر پر سعید اجمل ہیں جنہوں نے 19 میچز میں یہ کارنامہ انجام دیا۔اس طرح نعمان علی نے 22 ٹیسٹ میچز میں 100 وکٹیں مکمل کر کے پاکستانی اسپن بولنگ کی تاریخ میں نمایاں مقام حاصل کر لیا ہے۔
