خاتونِ اوّل آصفہ بھٹو زرداری نے چھاتی کے سرطان کی بروقت تشخیص اور روک تھام کے لیے حکومتی اداروں، طبی ماہرین، میڈیا اور کمیونٹیز کو مشترکہ جدوجہد کی ضرورت پر زور دیا ہے۔
ملاقات اور اہم نکات
پنک ربن پاکستان کے سی ای او عمر آفتاب سے ایوانِ صدر میں ملاقات کے دوران آصفہ بھٹو زرداری نے کہا کہ پاکستان میں ہر نو میں سے ایک خاتون چھاتی کے سرطان کے خطرے سے دوچار ہے اور تاخیر سے تشخیص ہر سال ہزاروں خواتین کی جان لے لیتی ہے۔انہوں نے کہا کہ بروقت تشخیص کی صورت میں شفا یابی کی شرح نوے فیصد سے زائد ہے، لہٰذا ہر خاتون کو اسکریننگ، درست تشخیص اور معیاری علاج کی سہولت میسر ہونی چاہیے۔
قومی ترجیح اور سہولیات میں اضافہ
خاتونِ اوّل نے خواتین کی صحت کو قومی ترجیح قرار دیتے ہوئے کہا کہ دیہی علاقوں میں چھاتی کے سرطان کی تشخیص اور علاج کی سہولیات بڑھانے کی اشد ضرورت ہے۔ انہوں نے موبائل میموگرافی یونٹس اور کمیونٹی آؤٹ ریچ پروگرامز کے فروغ پر بھی زور دیا۔
آگاہی مہم میں میڈیا اور مذہبی رہنماؤں کا کردار
آصفہ بھٹو زرداری نے کہا کہ میڈیا، تعلیمی ادارے اور مذہبی رہنما ملک گیر آگاہی مہم میں اہم کردار ادا کریں تاکہ چھاتی کے سرطان کے حوالے سے شعور اجاگر کیا جا سکے اور بروقت علاج ممکن بنایا جا سکے۔
