امریکی صدر ڈونلڈ ٹرمپ نے نائب صدر جے ڈی وینس اور وزیر خارجہ مارکو روبیو کو ہدایت کی ہے کہ ایران کے ساتھ سفارتی رابطے اور بات چیت کا سلسلہ جاری رکھا جائے۔
امریکی میڈیا رپورٹس کے مطابق صدر ٹرمپ کی ہدایات کا مقصد ایران کے ساتھ کشیدگی کو قابو میں رکھتے ہوئے جوہری پروگرام، علاقائی سلامتی اور دیگر اہم امور پر مذاکرات کے دروازے کھلے رکھنا ہے۔رپورٹس کے مطابق امریکی انتظامیہ ایک جانب ایران پر سفارتی اور سیاسی دباؤ برقرار رکھنے کی خواہاں ہے، جبکہ دوسری جانب تنازعات کے حل کے لیے مذاکراتی عمل کو بھی جاری رکھنا چاہتی ہے۔یہ پیش رفت ایسے وقت میں سامنے آئی ہے جب حالیہ دنوں میں امریکا اور ایران کے درمیان سخت بیانات اور کشیدگی میں اضافہ دیکھنے میں آیا، تاہم اس کے باوجود دونوں ممالک کے درمیان بالواسطہ سفارتی رابطوں کی اطلاعات بھی سامنے آتی رہی ہیں۔
تجزیہ کاروں کے مطابق صدر ٹرمپ کی جانب سے جے ڈی وینس اور مارکو روبیو کو مذاکرات جاری رکھنے کی ہدایت اس امر کی نشاندہی کرتی ہے کہ واشنگٹن ایران کے معاملے پر دباؤ اور سفارت کاری، دونوں حکمت عملیوں کو بیک وقت آگے بڑھا رہا ہے۔ماہرین کا کہنا ہے کہ آئندہ کسی ممکنہ پیش رفت یا معاہدے کا انحصار دونوں ممالک کے درمیان ہونے والے مذاکرات اور سفارتی رابطوں کے نتائج پر ہوگا۔
