لیفٹیننٹ جنرل نگار جوہر نے اسلام آباد میں 2 روزہ بین الاقوامی کانفرنس سے خطاب کرتے ہوئے لڑکیوں کی تعلیم پر زور دیا اور کہا کہ ہمیں معاشرتی رویوں کو چیلنج کرنا ہوگا تاکہ لڑکیاں تعلیم حاصل کر سکیں۔
انہوں نے بتایا کہ خواتین کی تعلیم سے معاشرتی ترقی ممکن ہے اور اس کے لیے نیشنل پالیسی اور بجٹ میں خصوصی اقدامات کی ضرورت ہے۔انہوں نے مزید کہا کہ ان کے لیے لڑکیوں کی تعلیم ایک دل سے قریب موضوع ہے، کیونکہ یہ موضوع معاشرتی تبدیلی کی بنیاد ہے۔ انہوں نے اپنی زندگی کا تجربہ شیئر کرتے ہوئے بتایا کہ وہ ایسے معاشرے میں پلی بڑھی جہاں صنفی تفریق تھی اور لڑکیوں کی تعلیم کو نظرانداز کیا جاتا تھا، مگر تعلیم نے ان کی زندگی میں انقلاب برپا کیا اور آج وہ اپنے ملک کی خدمت کر رہی ہیں۔جنرل نگار جوہر نے کہا کہ تعلیم کا حصول لڑکیوں کا حق ہے اور اس کے لیے جدوجہد کرنے والی بہادر لڑکیوں کو وہ خود جانتی ہیں۔ انہوں نے کہا کہ فیصلہ سازی اور پالیسی سازی میں خواتین کی شمولیت ضروری ہے تاکہ ان کی آواز سننے اور ان کے حقوق کا تحفظ کیا جا سکے۔
