لاہور میں بسنت منانے کی تیاریاں شروع، ضلعی انتظامیہ نے پتنگ بازی کو محفوظ اور منظم بنانے کے لیے سخت نظام وضع کر دیا ہے۔
شہر میں 6، 7 اور 8 فروری کو بسنت منانے کا اعلان کرتے ہوئے، انتظامیہ نے پتنگ، ڈور سازوں، فروشوں اور کائٹ فلائنگ ایسوسی ایشنز کی رجسٹریشن کے لیے 4 کیٹیگریز پر مبنی سرکاری فارم جاری کیے ہیں۔نئے ضابطہ کے تحت ہر پتنگ، ڈور اور دکان پر لازمی طور پر کیو آر کوڈ لگایا جائے گا، جس کا سرٹیفکیٹ رجسٹریشن کے بعد جاری کیا جائے گا۔ یہ کوڈ پتنگ اور ڈور پر چسپاں کرنے کے ساتھ دکانوں اور بینرز پر بھی نمایاں کیا جائے گا، اور دکان کے اندر سرٹیفکیٹ آویزاں کرنا لازمی ہوگا۔انتظامیہ نے پتنگ کے سائز 40 انچ، گڈا کی چوڑائی 30 انچ، اور ڈور کے معیار کے لیے سخت ہدایات جاری کی ہیں۔
پتنگ بنانے میں صرف مخصوص مواد استعمال کرنے کی اجازت ہے، جیسے کہ کمزور شیشہ، گلو، آٹا، اور سادہ رنگ، جبکہ تیز مانجا، دھاتی تار، اور کیمیکل مواد مکمل طور پر ممنوع قرار دیے گئے ہیں۔کائٹ فلائنگ ایسوسی ایشنز کے لیے فارم "سی" اور "ڈی" جاری کیے گئے ہیں، جن کی رجسٹریشن ڈپٹی کمشنر لاہور کی نگرانی میں ہوگی۔ انتظامیہ نے خبردار کیا ہے کہ ضابطہ کی خلاف ورزی کرنے والوں کے خلاف سخت کارروائی عمل میں لائی جائے گی، جس میں رجسٹریشن کی منسوخی بھی شامل ہے۔یہ منظّم نظام لاہور میں بسنت کو محفوظ اور خوشگوار بنانے کے لیے ایک اہم قدم ہے، تاکہ ثقافتی تہوار کے دوران کسی بھی ناخوشگوار واقعے سے بچا جا سکے۔
