حکومت اور گڈز ٹرانسپورٹرز کے مابین مذاکرات کامیابی حاصل کرنے میں ناکام رہے، جس کے نتیجے میں گڈز ٹرانسپورٹرز کی ہڑتال چوتھے دن بھی جاری ہے۔
اس ہڑتال کے سبب صوبہ بھر میں سپلائی چین شدید متاثر ہو رہی ہے اور بازاروں میں اشیائے ضروریہ کی قلت پیدا ہونے کا خدشہ بڑھ گیا ہے۔ٹرانسپورٹرز ٹریفک آرڈیننس 2025 کے نفاذ کے خلاف سراپا احتجاج ہیں اور اس میں فوری ریلیف کا مطالبہ کر رہے ہیں۔ پبلک ٹرانسپورٹرز نے حکومت سے مذاکرات کے بعد ہڑتال ختم کی ہے، مگر منی مزدا، ٹرک، اور ٹریلر سمیت تمام گڈز ٹرانسپورٹرز ابھی بھی ہڑتال پر ہیں۔اس مسلسل تعطل کے سبب روزمرہ کی سپلائی اور کاروباری سرگرمیوں پر منفی اثرات مرتب ہونا شروع ہو چکے ہیں، جس سے عوامی زندگی اور معیشت کو نقصان پہنچنے کا خدشہ ہے۔
