2سالوں میں اربوں کی مزید غیر ملکی سرمایہ کاری آچکی:چودھری شافع حسین

 الیکٹرک وہیکلز سیکٹر اور لیتھیئم بیٹریوں کی مینوفیکچرنگ کے کارخانے بھی لگ رہے ہیں:صوبائی وزیر
لاہور(سپیشل رپورٹر)صوبائی وزیر صنعت و تجارت  چودھری شافع حسین سے چین کی سرمایہ کار کمپنیوں کے حکام نے ملاقات کی۔پیسک ہاؤس میں ہونے والی ملاقات میں پنجاب میں چین کی کمپنیوں کی سرمایہ کاری پر بات چیت ہوئی۔صوبائی وزیر نے پنجاب کے سپیشل اکنامک زونز میں سرمایہ کاری کے مواقع سے آگاہ کیا۔    صوبائی وزیر صنعت و تجارت چوہدری شافع حسین نے کہاکہ چین کی متعدد کمپنیوں نے پنجاب کے مختلف شعبوں میں اربوں روپے کی سرمایہ کاری کر رکھی ہے،گزشتہ 2 سالوں میں اربوں روپے کی مزید غیر ملکی سرمایہ کاری آچکی ہے۔چین کی نئی کمپنیاں پنجاب کے مختلف شعبوں میں مزید سرمایہ کاری کر رہی ہیں۔پنجاب کے خصوصی اقتصادی زونز میں الیکٹرک وہیکلز سیکٹر اور لیتھیئم بیٹریوں کی مینوفیکچرنگ کے کارخانے بھی لگ رہے ہیںچوہدری شافع حسین نے کہاکہ پاکستان اور چین کے مابین مضبوط معاشی تعاون اور لازوال دوستی کا رشتہ موجود ہے۔چین کی کمپنیوں کی بڑھتی ہوئی سرمایہ کاری سے دونوں ممالک کے تعلقات مضبوط سے مضبوط تر ہورہے ہیں۔چین کی سرمایہ کار کمپنیوں نے پنجاب میں مزید سرمایہ کاری میں دلچسپی کااظہارکیا۔    سرمایہ کاروں کے وفد میں میرا پی سی چائنا کی ڈائریکٹرسنڈی چن،ای کامرس کی مسز رایا ہانگ ایمازون ،سپلائی چین مینجیم پرائیویٹ لمیٹڈ کے مسٹر مائیکل زینگ اور دیگر شامل تھے۔سابق نگران صوبائی وزیر سید اظفر علی ناصر بھی ملاقات میں موجود تھے۔