لاہور: پنجاب حکومت نے مالی سال 2024-25 کے بجٹ کے لیے تاریخ کا اعلان کر دیا ہے، جس کے مطابق صوبائی بجٹ 13 جون کو پیش کیا جائے گا۔
ذرائع کے مطابق محکمہ خزانہ پنجاب نے 13 جون کو صوبائی بجٹ اجلاس بلانے کی سمری حکومت کو ارسال کر دی ہے، جس کی محکمہ قانون نے بھی باقاعدہ منظوری دے دی ہے۔متعلقہ حکام کے مطابق صوبائی وزیر خزانہ 13 جون کو پنجاب اسمبلی میں مالی سال 2024-25 کا بجٹ پیش کریں گے۔ بجٹ اجلاس کی تیاریوں کا آغاز کر دیا گیا ہے، جب کہ متوقع طور پر بجٹ میں ترقیاتی منصوبوں کے لیے خطیر رقم مختص کیے جانے کا امکان ہے۔ذرائع کے مطابق آئندہ مالی سال کے بجٹ میں تعلیم، صحت، بنیادی ڈھانچے اور روزگار کے مواقع پر خصوصی توجہ دی جائے گی، جب کہ مہنگائی سے نمٹنے اور ریلیف فراہم کرنے کے لیے عوام دوست اقدامات بھی شامل کیے جانے کی توقع ہے۔اسمبلی اجلاس کے حوالے سے سیکیورٹی اور انتظامی تیاریوں کا بھی آغاز کر دیا گیا ہے، جب کہ بجٹ دستاویزات کو حتمی شکل دینے کا عمل جاری ہے۔
