پاکستان پیپلز پارٹی کی نائب صدر سینیٹر شیری رحمان نے معروف سینیئر صحافی زبیدہ مصطفیٰ کے انتقال پر گہرے دکھ اور افسوس کا اظہار کیا ہے۔
اپنے بیان میں شیری رحمان نے کہا کہ زبیدہ مصطفیٰ کا انتقال پاکستان کی صحافت کے لیے ایک ناقابل تلافی نقصان ہے۔ وہ ایک بہادر، نڈر اور بااصول صحافی تھیں جنہوں نے ہمیشہ انسانی حقوق، تعلیم اور جمہوریت کے لیے آواز بلند کی۔شیری رحمان کے مطابق جنرل ضیاء کے دورِ آمریت میں زبیدہ مصطفیٰ نے حق اور سچ کے لیے بھرپور مزاحمت کی اور خواتین صحافیوں کے لیے مشعل راہ بنیں۔ انہوں نے اپنی زندگی کے آخری لمحات تک سماجی ناانصافیوں اور کمزور طبقات کے لیے قلم کا استعمال جاری رکھا۔ ان کا صحافتی کردار ہمیشہ یاد رکھا جائے گا۔گزشتہ روز کراچی پریس کلب نے بھی اپنے ایک تعزیتی بیان میں زبیدہ مصطفیٰ کو پاکستانی صحافت کی ایک علامت قرار دیتے ہوئے کہا کہ وہ نہ صرف ایک سینیئر صحافی تھیں بلکہ ایک ادارے کا درجہ رکھتی تھیں۔
ان کی سچائی سے وابستگی، بصیرت پر مبنی تجزیے اور سماجی انصاف کے لیے مسلسل جدوجہد نے پاکستانی صحافت کو ایک نیا معیار دیا۔بیان میں مزید کہا گیا کہ انہوں نے مردوں کے غلبے والے صحافتی میدان میں تمام رکاوٹیں عبور کیں اور خواتین کے لیے ایک نئی راہ متعین کی۔ تعلیم، صحت، اور دیگر سماجی موضوعات پر ان کا کام ان کی بے لوث ہمدردی اور عوامی خدمت کے جذبے کی گواہی دیتا ہے۔کراچی پریس کلب نے کہا کہ زبیدہ مصطفیٰ کی صحافت میں موجودگی ہمیشہ محسوس کی جاتی رہے گی، لیکن ان کی خدمات، اصول اور ورثہ آنے والی نسلوں کے لیے ہمیشہ مشعلِ راہ رہیں گے۔
