ویب ڈیسک: کراچی چیمبر آف کامرس اینڈ انڈسٹری کے صدر جاوید بلوانی نے واضح کیا ہے کہ ملک گیر شٹرڈاؤن ہڑتال ملتوی ہوگی نہ منسوخ، تمام تیاریاں مکمل ہیں، تاجر برادری بھرپور شرکت کرے گی۔
کراچی میں میڈیا سے گفتگو کرتے ہوئے جاوید بلوانی نے کہا کہ 19 جولائی کو شیڈول کے مطابق ملک بھر میں ہڑتال ہوگی، کسی تاخیر یا منسوخی کی کوئی گنجائش نہیں ہے۔ ہڑتال کے خلاف پھیلائی جانے والی افواہیں بے بنیاد ہیں اور ایسے عناصر کا تاجر برادری سے کوئی تعلق نہیں۔انہوں نے کہا کہ یہ فیصلہ چاروں صوبوں کے بڑے چیمبرز سے مشاورت کے بعد کیا گیا ہے اور اگر ہڑتال مؤخر یا منسوخ کرنی بھی پڑی تو وہ فیصلہ بھی اجتماعی مشاورت سے ہی کیا جائے گا۔جاوید بلوانی نے کہا:"افواہیں پھیلانے والے کاروباری برادری کے خیر خواہ نہیں، بلکہ گمراہ کن اور انتشار پھیلانے والے عناصر ہیں۔"
انہوں نے کہا کہ یہ ہڑتال صرف تاجروں کا نہیں بلکہ ملک و قوم کے وسیع تر مفاد کا مسئلہ ہے، اس لیے دکاندار، صنعتکار اور کاروباری طبقہ مکمل اتحاد کے ساتھ شٹر بند رکھے گا۔مزید کہا گیا کہ:عوام اور تاجر افواہوں پر کان نہ دھریں۔تمام پارٹنر چیمبرز کی موجودگی میں کسی بھی قسم کی تبدیلی کا اعلان مشترکہ پریس کانفرنس میں ہی کیا جائے گا۔ملک گیر ہڑتال کا فیصلہ متفقہ مشاورت کا نتیجہ ہے جسے سبوتاژ کرنے کی کوششیں ناکام ہوں گی۔واضح رہے کہ جاوید بلوانی متعدد بار حکومتی معاشی پالیسیوں پر تنقید کر چکے ہیں، اور یہ ہڑتال بھی انہی پالیسیوں کے خلاف احتجاج کا حصہ ہے۔
