چیمپئنز ٹرافی 2025 کے لیے غیر ملکی کرکٹ ٹیموں کی پاکستان آمد فروری کے پہلے ہفتے میں متوقع ہے۔
میڈیا رپورٹس کے مطابق، نیوزی لینڈ اور جنوبی افریقہ کی ٹیمیں 2025 کے آغاز میں پاکستان پہنچیں گی اور میزبان ٹیم کے ساتھ کراچی اور لاہور میں میچز کھیلیں گی۔ٹورنامنٹ کی تیاریوں کے سلسلے میں 12 سے 18 فروری تک پریکٹس میچز منعقد کیے جائیں گے، جن کا انعقاد لاہور، کراچی اور راولپنڈی کے کرکٹ اسٹیڈیمز میں ہوگا۔ ان پریکٹس میچز میں 8 شریک ٹیمیں حصہ لیں گی، اور یہ میچز ٹورنامنٹ سے پہلے کرکٹ کی تیاریوں کے لیے اہم ہیں۔اسی دوران، آسٹریلیا اور انگلینڈ کی کرکٹ ٹیمیں 10 فروری کے بعد لاہور پہنچیں گی، جبکہ افغانستان کی ٹیم بھی فروری کے دوسرے ہفتے میں کراچی پہنچے گی۔
انٹرنیشنل کرکٹ کونسل (آئی سی سی) نے ہر ٹیم کو 2 اضافی پریکٹس میچز کھیلنے کی اجازت دی ہے، جنہیں کھیلنے یا نہ کھیلنے کا فیصلہ ٹیمیں خود کریں گی۔چیمپئنز ٹرافی کا آغاز 19 فروری کو پاکستان اور نیوزی لینڈ کے درمیان میچ سے ہوگا، جبکہ ایونٹ کا فائنل 9 مارچ کو کھیلا جائے گا۔ اس ٹورنامنٹ میں مجموعی طور پر 8 ٹیمیں حصہ لے رہی ہیں اور یہ ایونٹ پاکستان میں کرکٹ کے شائقین کے لیے ایک بڑا موقع ثابت ہوگا۔
