فروری انتخابات : الیکشن ٹریبونلز کی کارکردگی بارے فافن کی چھٹی رپورٹ جاری

 ٹریبونلز نے 30 فیصد مقدمات نمٹا دیے ،قومی اسمبلی نشستوں پر دائر123 درخواستوں میں سے 25 کا فیصلہ ہوا
اسلام آباد(مانیٹرنگ ڈیسک)فری اینڈ فیئر الیکشن نیٹ ورک (فافن) نے 8 فروری 2024 کو ہونے والے عام انتخابات کے بعد قائم الیکشن ٹریبونلز کی کارکردگی پر اپنی چھٹی رپورٹ جاری کر دی۔فافن نے اپنی تفصیلی رپورٹ میں بتایا کہ الیکشن ٹریبونلز نے جنوری 2025 میں مزید 11 درخواستوں کا فیصلہ کیا، جس کے بعد فیصلہ کی گئیں درخواستوں کی تعداد بڑھ کر 112 ہوگئی ہے۔رپورٹ میں بتایا گیا ہے کہ الیکشن ٹریبونلز نے 30 فیصد مقدمات نمٹا دیے ہیں، 9 درخواستوں کا فیصلہ لاہور کے تین ٹریبونلز نے کیا، بہاولپور اور کراچی کے ٹریبونلز نے ایک،ایک درخواست کا فیصلہ کیا۔ فیصلہ کی گئی درخواستوں میں سے 6 تحریک انصاف کے حمایت یافتہ امیدواران کی تھیں، 4 مسلم لیگ (ن )اور ایک درخواست استحکام پاکستان پارٹی کے امیدوار کی تھی، مذکورہ تمام 11 درخواستیں مسترد کر دی گئیں۔ٹریبونلز کی کارکردگی کے حوالے سے کہا گیا ہے کہ2024 کی آخری سہ ماہی میں انتخابی تنازعات کے حل کا عمل تیز ہوا تھا، بلوچستان کے تینوں ٹریبونلز نے تقریباً 70 درخواستوں کا فیصلہ کیا تھا۔اسی طرح پنجاب کے ٹریبونلز میں درخواستیں نمٹانے کا عمل تیز ہوا جہاں 23 ٹریبونلز میں 371 انتخابی درخواستیں دائر کی گئی تھیں، اب تک بلوچستان کے تین ٹریبونلز نے 51 میں سے 41 درخواستیں نمٹا دی ہیں اور پنجاب کے 9 ٹریبونلز نے 192 میں سے 45، سندھ کے 5 ٹریبونلز نے 83 میں سے 17 اور خیبر پختونخوا  کے 6 ٹریبونلز نے 42 میں سے 9 درخواستوں کا فیصلہ کیا ہے۔فافن نے بتایا کہ اب تک قومی اسمبلی کی نشستوں پر دائر123 درخواستوں میں سے 25 کا فیصلہ ہوا، صوبائی اسمبلیوں کی نشستوں کے خلاف 248 میں سے 87 درخواستوں کا فیصلہ ہو چکا ہے، جن میں بلوچستان اسمبلی کی 34، پنجاب اسمبلی کی 33، سندھ اسمبلی کی 13 اور خیبر پختونخوا اسمبلی کی 7 درخواستوں پر فیصلے ہوئے۔رپورٹ کے مطابق 112 طے شدہ درخواستوں میں سے 108 مسترد، 3 منظور اور ایک درخواست مدعی کی وفات کے باعث ختم کر دی گئی، 108 مسترد درخواستوں میں سے 43 ناقابل سماعت قرار دی گئیں، 9 واپس لے لی گئیں، 12 عدم پیروی کی وجہ سے مسترد ہوئیں اور ایک درخواست مقررہ فیس کی عدم ادائیگی کی وجہ سے خارج ہوئی۔