آبنائے ہرمز میں عمان کے نزدیک ایک آئل ٹینکر کو میزائل حملے کا دعویٰ سامنے آیا ہے، تاہم کسی بھی سرکاری ادارے یا بین الاقوامی خبر رساں ادارے کی جانب سے اس واقعے کی تصدیق نہیں ہو سکی ہے۔
یہ اطلاع سوشل میڈیا پر سرگرم ایک اکاؤنٹ کی جانب سے دی گئی، جس نے رات کے وقت سمندر میں آگ یا دھماکے جیسی روشنی ظاہر کرنے والی ایک ویڈیو بھی شیئر کی ہے۔دعویٰ کیا گیا ہے کہ ایران کے جنوبی علاقے سِریک سے متعدد اینٹی شپ کروز میزائل داغے گئے، جنہوں نے عمان کے ساحل کے قریب سے گزرنے والے ایک آئل ٹینکر کو نشانہ بنایا۔ سوشل میڈیا پر گردش کر رہی اطلاعات کے مطابق حملے کے بعد جہاز میں آگ لگ گئی۔ تاہم، اس کی آزادانہ تصدیق نہیں ہو سکی ہے اور ابھی تک متاثرہ جہاز کا نام، ملکیت، تیل کی مقدار، عملے کی تعداد یا کسی جانی نقصان کی تفصیلات بھی سامنے نہیں آئیں ہیں۔
اہم بات یہ ہے کہ برطانوی میری ٹائم سکیورٹی ادارے، امریکی سینٹرل کمانڈ، ایرانی سرکاری میڈیا یا بڑے عالمی خبر رساں اداروں کی جانب سے اس واقعہ کی تصدیق نہیں ہوئی ہے۔ اس لیے یہ اطلاع تاحال ایک غیر مصدقہ دعویٰ کے طور پر سمجھی جا رہی ہے۔یہ واقعہ اس وقت رپورٹ ہوا ہے جب آبنائے ہرمز میں تجارتی جہازوں کی آمدورفت پہلے ہی دباؤ کا شکار ہے اور ایران و عمان کے درمیان اس اہم بحری گزرگاہ سے متعلق نئے بحری انتظامات پر مذاکرات جاری ہیں۔
