پورے ملک نے پہیہ جام ہڑتال کی کال مسترد کردی: وزیراعلیٰ سندھ

ہمارا ملک ہڑتال جیسی کال کا متحمل نہیں ہوسکتا‘  اتوار کو بھی شہریوں نے اپنی دکانیں کھولیں، اسلام آباد سانحہ پر کراچی کے شہری افسردہ تھے:تقریب سے خطاب
کراچی(مانیٹرنگ ڈیسک)وزیراعلیٰ سندھ سید مراد علی شاہ نے کہا ہے  پورے ملک نے پہیہ جام ہڑتال کی کال کو مسترد کردیا ہے۔ایکسپو سینٹر میں مائی کراچی نمائش کی اختتامی تقریب کے دوران وزیر اعلیٰ سندھ نے مختلف اسٹالز کا معائنہ کیا اور پھر تقریب سے خطاب بھی کیا۔انہوں نے کہا  پورے ملک نے پہیہ جام پڑتال کی کال کو مسترد کیا، ہمارا ملک ہڑتال جیسی کال کا متحمل نہیں ہوسکتا۔انہوں نے کہا  اتوار کو بھی شہریوں نے اپنی دکانیں کھولیں، اسلام آباد سانحہ پر کراچی کے شہری افسردہ تھے۔ کئی دوست ممالک نے بھی اسٹالز لگائے اور اپنی مصنوعات پیش کیں، ہم نے کراچی میں عمارتوں کا سروے کرایا ہے۔انہوں نے کہا  کے فور کی شروعات 10 سے 11 سال پہلے ہوئی تھی، اس پر میں کسی اور کو نہیں اپنے آپ کو الزام دیتا ہوں۔ وفاق نے کہا تھا کہ مین لائن کا کام ہم خود کریں گے، ایک صاحب نے 3، 4 سال کیلیے کے فور پر کام رکوا دیا۔