ریاض: یمن کے حوثی گروپ نے دعویٰ کیا ہے کہ اس نے سعودی عرب کے دارالحکومت ریاض کے کنگ خالد انٹرنیشنل ایئرپورٹ کو بیلسٹک میزائل سے نشانہ بنایا ہے۔
حوثی فوجی ترجمان یحییٰ سریع نے جمعرات کو سوشل میڈیا پلیٹ فارم ’ایکس‘ پر جاری بیان میں کہا کہ حوثی جنگجوؤں نے ریاض ایئرپورٹ کو بیلسٹک میزائل سے نشانہ بنایا، جو ان کے بقول اپنے ہدف پر درست طور پر لگا۔ترجمان نے مزید دعویٰ کیا کہ میزائل حملے کے نتیجے میں ایئرپورٹ کی سرگرمیاں متاثر ہوئیں اور پروازوں سے متعلق آپریشنز میں خلل پڑا۔یہ دعویٰ سعودی عرب کے خلاف حوثیوں کی جانب سے حملوں کے سلسلے کی تازہ کڑی ہے۔ ایران کی حمایت یافتہ حوثی تحریک ماضی میں بھی سعودی عرب کے مختلف علاقوں اور اہم تنصیبات کو میزائلوں اور ڈرونز سے نشانہ بنانے کے دعوے کرتی رہی ہے۔تاہم تازہ حملے کے حوالے سے سعودی حکام کی جانب سے فوری طور پر کسی حملے یا نقصانات کی تصدیق سامنے نہیں آئی۔ اس لیے حوثیوں کے میزائل حملے اور ایئرپورٹ کی سرگرمیوں میں خلل سے متعلق دعوے کی آزادانہ طور پر تصدیق نہیں ہوسکی۔
