ٹرمپ کا 2لاکھ سے زائد پناہ گزین یوکرینی باشندوں کی قانونی حیثیت ختم کرنے کافیصلہ

 فیصلے سے5لاکھ 30ہزارکیوبن، ہیٹی، نکاراگون اور وینزویلین باشندوں کی بھی قانونی حیثیت ختم کیے جانے کاامکان
 واشنگٹن(آئی این پی ) امریکی صدر ڈونلڈ ٹرمپ کی حکومت نے تقریبا ً2لاکھ 40ہزار یوکرینی باشندوں کی عارضی قانونی حیثیت ختم کرنے کا فیصلہ کر لیا ہے، جو روس،یوکرین جنگ کے بعد امریکا میں پناہ گزین ہوئے تھے۔ اس فیصلے سے متاثرہ افراد کو تیزی سے ملک بدری کا سامنا کرنا پڑ سکتا ہے۔غیرملکی خبررساںدارے کے مطابق یہ اقدام بائیڈن انتظامیہ کے دوران مہاجرین کے لیے بنائی گئی پالیسیوں کے خاتمے کا حصہ ہے۔ ٹرمپ حکومت کا یہ منصوبہ اپریل میں نافذ ہونے کا امکان ہے، جس کے تحت نہ صرف یوکرینی مہاجرین بل کہ 5لاکھ 30ہزارکیوبن، ہیٹی، نکاراگون اور وینزویلین باشندوں کی بھی قانونی حیثیت ختم کی جا سکتی ہے۔امریکی محکمہ برائے ہوم لینڈ سکیورٹی نے اس حوالے سے کسی سرکاری اعلان سے انکار کیا ہے، تاہم ذرائع کے مطابق جو افراد عارضی ویزا پر امریکا میں داخل ہوئے تھے، ان کی تیزی سے ملک بدری کا امکان ہے۔