ماسکو: روسی صدر ولادیمیر پیوٹن اور بھارت کے قومی سلامتی کے مشیر اجیت ڈووال کے درمیان اہم ملاقات ہوئی ہے۔
یہ اجلاس اس وقت ہوا جب امریکہ نے بھارت پر روسی تیل کی خریداری کی وجہ سے بھارتی مصنوعات پر 25 فیصد اضافی ٹیرف عائد کرنے کا اعلان کیا ہے۔ وائٹ ہاؤس کے مطابق، یہ نیا ٹیرف تین ہفتوں میں نافذ کیا جائے گا، جس کا مقصد روس پر دباؤ ڈالنا ہے تاکہ وہ یوکرین میں جاری جنگ کو ختم کرے، اور روس کے ساتھ تجارت کرنے والے ممالک کو متاثر کیا جا سکے۔روسی حکومت کی جانب سے جاری کردہ ویڈیو میں پیوٹن اور اجیت ڈووال کو ہاتھ ملاتے ہوئے دیکھا جا سکتا ہے، مگر ملاقات کی تفصیلات جاری نہیں کی گئی ہیں۔ اس سے پہلے ایک ملاقات میں، اجیت ڈووال نے کہا تھا کہ پیوٹن کے بھارت کے دورے کی تاریخیں تقریباً طے پا چکی ہیں۔
کریملن نے امریکہ کے روس سے تجارتی تعلقات ختم کرنے کے مطالبات کو غیر قانونی قرار دیا ہے۔یاد رہے کہ بھارت روسی تیل کا بڑا خریدار ہے، جو ماسکو کے بجٹ کا اہم ذریعہ ہے۔ بھارت اور روس کے تعلقات سوویت دور سے مضبوط رہے ہیں، اور روس بھارت کو اسلحہ فراہم کرنے والا اہم ترین ملک ہے۔ بھارت کا موقف ہے کہ وہ روس سے تیل خرید رہا ہے کیونکہ یورپ نے روسی سپلائیز روک دی تھیں اور بھارت کو متبادل ذرائع کی ضرورت ہے۔
