اسلام آباد: بین الاقوامی شہرت یافتہ پاکستانی ریسلر اور دو مرتبہ گولڈ میڈلسٹ انعام بٹ کا ڈوپ ٹیسٹ مثبت آنے کا انکشاف ہوا ہے، جس کے بعد ان کے خلاف ممکنہ کارروائی اور پابندی کا معاملہ زیرِ غور ہے۔
تفصیلات کے مطابق انعام بٹ کا ڈوپ ٹیسٹ رواں سال اپریل میں چین میں منعقد ہونے والے ایشین بیچ گیمز کے دوران لیا گیا تھا، جس کا نتیجہ مثبت آیا ہے۔ذرائع کے مطابق ٹیسٹ مثبت آنے کے بعد انعام بٹ اور عالمی اینٹی ڈوپنگ حکام کے درمیان معاملے کی وضاحت کے لیے بات چیت جاری ہے۔ اگر ورلڈ اینٹی ڈوپنگ ایجنسی (واڈا) ان کے مؤقف اور فراہم کردہ وضاحت سے مطمئن نہ ہوئی تو ریسلر کو پابندی کا سامنا کرنا پڑ سکتا ہے۔انعام بٹ کے قریبی ذرائع کا مؤقف ہے کہ ایشین بیچ گیمز سے قبل ریسلر نے آنکھوں کے علاج کے لیے کچھ ادویات استعمال کی تھیں۔ ذرائع کے مطابق ان ادویات کا قوت بڑھانے یا کھیل میں کارکردگی بہتر بنانے کے لیے استعمال سے کوئی تعلق نہیں تھا۔ذرائع کا کہنا ہے کہ انعام بٹ نے واڈا کو استعمال کی جانے والی ادویات کی فہرست، میڈیکل اسکینز اور ڈاکٹروں کے نسخے سمیت متعلقہ طبی دستاویزات سے آگاہ کیا تھا۔ذرائع کے مطابق واڈا کی جانب سے انعام بٹ کو ایک سال تک ان ادویات کے استعمال کی اجازت بھی دی گئی تھی۔
تاہم ڈوپ ٹیسٹ کے مثبت نتیجے کے بعد معاملے کی مزید وضاحت اور ادویات کے استعمال کی قانونی حیثیت کا جائزہ لیا جا رہا ہے۔انعام بٹ پاکستان کے نمایاں ریسلرز میں شمار ہوتے ہیں اور بین الاقوامی مقابلوں میں ملک کے لیے گولڈ میڈلز جیت چکے ہیں۔ ڈوپنگ کیس کا حتمی فیصلہ ان کے مستقبل کے کھیل اور ممکنہ پابندی کے حوالے سے اہم قرار دیا جا رہا ہے۔دوسری جانب انعام بٹ اور عالمی اینٹی ڈوپنگ حکام کے درمیان معاملے پر بات چیت جاری ہے، جبکہ حتمی فیصلہ سامنے آنے تک ریسلر کے خلاف کسی ممکنہ پابندی کی حتمی مدت کے بارے میں کچھ کہنا قبل از وقت ہوگا۔
