کراچی کے علاقے ابراہیم حیدری کے قریب ایک افسوسناک حادثہ پیش آیا جس میں گہرے سمندر میں ڈوبنے سے نوجوان جان کی بازی ہار گیا۔
پولیس کے مطابق واقعہ میں جاں بحق نوجوان کی شناخت 21 سالہ سرفراز علی شیخ کے نام سے ہوئی ہے، جبکہ ان کے والد 55 سالہ دیدار علی شیخ کو نیم بیہوش حالت میں فوری طور پر قریبی اسپتال منتقل کیا گیا۔ابتدائی اطلاعات کے مطابق جاں بحق اور زخمی دونوں افراد ماہی گیری کے پیشے سے تعلق رکھتے تھے اور سمندر میں معمول کی سرگرمی کے دوران حادثے کا شکار ہوئے۔ڈاکس پولیس نے واقعے کی اطلاع ملتے ہی جائے وقوعہ پر پہنچ کر تفتیش شروع کر دی ہے۔
پولیس اہلکاروں کا کہنا ہے کہ حادثے کی وجوہات جاننے کے لیے گہرے سمندر اور قریبی علاقوں میں تحقیقات کی جا رہی ہیں تاکہ معلوم کیا جا سکے کہ یہ حادثہ کس طرح پیش آیا۔واقعے کے بارے میں مقامی لوگوں نے بتایا کہ سمندر میں اچانک لہروں کی شدت بڑھ گئی تھی، جس کے باعث نوجوان سمندر میں ڈوب گئے۔ پولیس اور ریسکیو ٹیمیں متاثرہ علاقے میں موجود ہیں اور تحقیقات کے دوران ممکنہ حفاظتی اقدامات کا جائزہ لے رہی ہیں تاکہ آئندہ ایسے حادثات سے بچا جا سکے۔
