اسلام آباد:پاکستان کے چیف جسٹس یحییٰ آفریدی سے آزاد کشمیر کے چیف جسٹس راجہ سعید اکرم خان کی ملاقات ہوئی، جس دوران دونوں نے باہمی دلچسپی کے امور پر تفصیل سے بات چیت کی۔
اس ملاقات کا مقصد عدالتی تعلقات کو مزید مستحکم کرنا اور دونوں خطوں میں عدالتی تعاون کو بڑھانا تھا۔اعلامیے کے مطابق، چیف جسٹس آزاد کشمیر راجہ سعید اکرم خان نے چیف جسٹس یحییٰ آفریدی کو پاکستان کا اعلیٰ ترین آئینی اور عدالتی عہدہ سنبھالنے پر دل کی گہرائیوں سے مبارکباد پیش کی۔ اس کے علاوہ، انہوں نے قانون کی حکمرانی اور انصاف کی مؤثر فراہمی کے حوالے سے نیک خواہشات کا اظہار کیا۔ملاقات میں عدالتی تعاون اور ادارہ جاتی ترقی کے حوالے سے عزم کا اعادہ کیا گیا۔ اس موقع پر، چیف جسٹس راجہ سعید اکرم خان نے چیف جسٹس یحییٰ آفریدی کو آزاد کشمیر میں ہونے والی "آزاد کشمیر انٹرنیشنل جوڈیشل کانفرنس" میں شرکت کی دعوت بھی دی۔
اعلامیے کے مطابق، یہ عالمی جوڈیشل کانفرنس 10 مئی کو مظفر آباد میں منعقد کی جائے گی۔ کانفرنس میں قانونی ماہرین، عدلیہ کے ارکان، اور اسکالرز شرکت کریں گے۔ اس کانفرنس کا مقصد آزاد کشمیر کے عدالتی ڈھانچے کی انفرادیت پر روشنی ڈالنا اور اہم قانونی و عدالتی امور پر تبادلہ خیال کرنا ہے۔
