روس نے یوکرین کے دارالحکومت کیف پر ایک اور بڑا میزائل اور ڈرون حملہ کیا، جس میں رہائشی علاقوں کو نشانہ بنایا گیا۔
حملے کے نتیجے میں کم از کم 24 افراد ہلاک اور 100 سے زائد زخمی ہو گئے۔یوکرینی حکام کے مطابق حملہ پیر کے روز نیٹو اجلاس سے ایک روز قبل کیا گیا۔ کیف کے پوڈلسکی ضلع میں ایک کثیر منزلہ رہائشی عمارت شدید متاثر ہوئی، جبکہ شہر کے نواحی علاقے وِشنِیوے میں بھی جانی نقصان ہوا۔یوکرین کے صدر وولودیمیر زیلنسکی نے حملے کو "بہیمانہ" قرار دیتے ہوئے کہا کہ روس کی حکمت عملی میں کوئی تبدیلی نہیں آئی۔ انہوں نے بتایا کہ یوکرینی فضائی دفاع نے متعدد ڈرونز اور کروز میزائل تباہ کیے، تاہم بیلسٹک میزائلوں کے خلاف دفاعی صلاحیت اب بھی ناکافی ہے۔زیلنسکی نے نیٹو ممالک سے جدید فضائی دفاعی نظام کی فوری فراہمی کی اپیل کی، جبکہ نیٹو کے سیکریٹری جنرل مارک روٹے نے کہا کہ اتحادی ممالک کو یوکرین کی دفاعی ضروریات پوری کرنے کے لیے ہر ممکن تعاون جاری رکھنا چاہیے۔
