ایران کے صدر مسعود پزشکیان نے امریکا کے ساتھ بڑھتی ہوئی کشیدگی کے تناظر میں سخت اور دو ٹوک مؤقف اختیار کرتے ہوئے واضح کیا ہے کہ ایران کسی بھی قسم کی دھمکی یا دباؤ کے سامنے جھکنے کو تیار نہیں۔
ان کے بیانات اور سوشل میڈیا پیغامات کے مطابق انہوں نے کہا کہ مسلمان صرف اللہ کے سامنے جھکتے ہیں، اس لیے کسی بھی عالمی طاقت کی دھمکی یا دباؤ ایران کے مؤقف کو تبدیل نہیں کر سکتا۔ انہوں نے امریکی حکام کو مخاطب کرتے ہوئے زور دیا کہ ایران کو فوجی کارروائی کی دھمکیاں دینا بند کی جائیں۔مسعود پزشکیان نے مزید کہا کہ موجودہ عالمی نظام میں ناانصافی، طاقت کا غلط استعمال اور قوانین کی خلاف ورزی بڑھ رہی ہے، جس کی بنیادی وجہ سیاست کو صرف طاقت کے توازن تک محدود کر دینا ہے۔ ان کے مطابق ایران خود کو ایک ذمہ دار ریاست کے طور پر پیش کرتا ہے جو اخلاقی اصولوں، انصاف اور عالمی استحکام کی حمایت کرتا ہے۔تجزیہ کاروں کے مطابق یہ بیان ایسے وقت میں سامنے آیا ہے جب امریکا اور ایران کے درمیان کشیدگی میں اضافہ دیکھا جا رہا ہے اور مشرقِ وسطیٰ میں سکیورٹی صورتحال پہلے سے زیادہ حساس ہو گئی ہے۔
