کراچی: سینئر صوبائی وزیر اور وزیر اطلاعات سندھ شرجیل انعام میمن نے کہا ہے کہ کشمیر کے مسئلے پر پوری سندھ اسمبلی متحد ہے اور تمام سیاسی جماعتوں نے اختلافات بھلا کر یکجہتی کا مظاہرہ کیا ہے۔
سندھ اسمبلی میں خطاب
سندھ اسمبلی میں اظہار خیال کرتے ہوئے شرجیل میمن نے کہا کہ:
کشمیر کے معاملے پر آج ایوان میں تمام جماعتیں یک آواز نظر آئیں۔
بھارت نے کشمیر پر قبضہ کر رکھا ہے اور مودی حکومت نے اقوام متحدہ کی قراردادوں کو پامال کرتے ہوئے کشمیر کی حیثیت تبدیل کرنے کی کوشش کی ہے۔
لاکھوں بھارتی فوج نے کشمیر کو محصور کر رکھا ہے، عالمی برادری کو اپنی قراردادوں پر عملدرآمد کرانا ہوگا۔
ذوالفقار اور بے نظیر بھٹو کا کردار
شرجیل میمن نے کہا کہ:شہید ذوالفقار علی بھٹو نے صرف 15 برس کی عمر میں قائداعظم کو کشمیر کے مسئلے پر خط لکھا تھا اور کہا تھا کہ "کشمیر پر مجھ سے کبھی غلطی نہیں ہو سکتی"۔بھٹو نے ہر فورم پر کشمیر کا مقدمہ لڑا۔شہید محترمہ بے نظیر بھٹو نے بھی دنیا بھر میں کشمیر کے مسئلے کو بھرپور انداز میں اٹھایا۔
بلاول بھٹو کا ذکر
انہوں نے مزید کہا کہ بلاول بھٹو زرداری نے بھارت کا دورہ کیا، جہاں ان کے سر کی قیمت مقرر کی گئی تھی، لیکن انہوں نے خطرات کے باوجود وہاں کشمیر کا مسئلہ بھرپور انداز میں اٹھایا۔
اسمبلی میں تقاریر کی نمائش
اس موقع پر شرجیل میمن نے ذوالفقار بھٹو اور بے نظیر بھٹو کی کشمیر کے متعلق تاریخی تقاریر اسمبلی کی اسکرین پر چلائیں۔وزیر اطلاعات سندھ نے کہا کہ کشمیر پر کسی قسم کی سودے بازی نہیں ہوگی اور عالمی برادری کو چاہیے کہ وہ بھارت پر دباؤ ڈال کر اقوام متحدہ کی قراردادوں پر عمل کرائے۔
