وزیرِ اطلاعات سندھ شرجیل انعام میمن نے اعلان کیا ہے کہ آج شام اسلام آباد میں ہونے والے سی سی آئی (کونسل آف کامن انٹرسٹس) اجلاس میں سندھ کے دریائے سندھ سے نکالے جانے والے متنازعہ کینال منصوبے پر فیصلہ متوقع ہے۔
یہ اجلاس حکومتِ سندھ کی درخواست پر وزیرِ اعظم شہباز شریف نے قبل از وقت طلب کیا ہے، جو پہلے 2 مئی کو ہونا تھا۔ اجلاس میں وزیرِ اعلیٰ سندھ مراد علی شاہ بھی شرکت کریں گے، جنہوں نے اس منصوبے کو سندھ کے مفادات کے خلاف قرار دیتے ہوئے اس کی مخالفت کی ہے۔ اس سے قبل سندھ بھر میں اس منصوبے کے خلاف احتجاجی مظاہرے اور دھرنے جاری تھے، جن کی وجہ سے تجارتی سرگرمیاں متاثر ہو رہی تھیں۔ شرجیل میمن نے تمام سیاسی جماعتوں اور وکلاء برادری سے اپیل کی ہے کہ وہ سڑکیں کھولیں تاکہ عوامی نقل و حرکت اور تجارتی سرگرمیاں بحال ہو سکیں۔وزیرِ اطلاعات نے اس امید کا اظہار کیا ہے کہ سی سی آئی اجلاس کے بعد یہ معاملہ مستقل طور پر حل ہو جائے گا اور احتجاج کا سلسلہ ختم ہو جائے گا۔
