بھارتی پنجاب سے بڑی تعداد میں سکھ یاتری بابا گرو نانک کے 556ویں جنم دن کی تقریبات میں شرکت کے لیے پاکستان روانہ ہو گئے ہیں۔
سکھ یاتری خصوصی ٹرینوں کے ذریعے پاکستان پہنچیں گے، جہاں وہ ننکانہ صاحب، حسن ابدال اور کرتارپور سمیت دیگر مقدس مقامات پر مذہبی رسومات ادا کریں گے۔یہ تقریبات ہر سال کی طرح اس بار بھی دنیا بھر سے سکھ برادری کے افراد کی شرکت سے منائی جا رہی ہیں۔ بابا گرو نانک کے جنم دن کی تقریبات کو مذہبی جوش و خروش کے ساتھ منایا جا رہا ہے، جو 17 نومبر تک جاری رہیں گی۔خبرایجنسی کے مطابق، مئی میں پاکستان اور بھارت کے درمیان کشیدگی اور جھڑپوں کے بعد یہ یاتریوں کا پاکستان آنے کا پہلا موقع ہے۔ اس موقع پر پاکستان میں سکھ برادری اور متروکہ وقف املاک بورڈ کی جانب سے یاتریوں کے لیے سخت سیکیورٹی اور مخصوص انتظامات کیے گئے ہیں، جن میں رہائش، خوراک، اور سفری سہولیات شامل ہیں تاکہ یاتریوں کو آسانی اور حفاظت فراہم کی جا سکے۔
پاکستان کی حکومت اور مقامی انتظامیہ کی جانب سے مذہبی رواداری اور امن کے پیغام کے تحت یہ انتظامات کیے گئے ہیں تاکہ یاتریوں کو مقدس مقامات کی زیارت اور مذہبی رسومات کی ادائیگی میں کوئی مشکل درپیش نہ ہو۔بابا گرو نانک دیو جی کی سالگرہ کی تقریبات مذہبی عقیدت اور محبت کے ساتھ منائی جا رہی ہیں، اور یہ یاتریوں کے لیے روحانی سفر کا اہم موقع ہے۔
