بابا گرونانک کے 556ویں جنم دن کی تقریبات کے سلسلے میں پاکستان میں سکھ برادری کی مذہبی اور ثقافتی سرگرمیاں زور و شور سے جاری ہیں۔
اس سلسلے میں، حکومت پاکستان نے بھارت سمیت دنیا بھر سے آنے والے سکھ یاتریوں کے لیے ویزے جاری کیے ہیں، جن کے تحت تقریباً 2,200 بھارتی یاتری 4 نومبر کو واہگہ بارڈر کے راستے لاہور پہنچیں گے۔ یہ یاتری 10 روز تک پاکستان میں قیام کریں گے اور مختلف مذہبی مقامات پر مذہبی رسومات انجام دیں گے۔یاتری ننکانہ صاحب، حسن ابدال پنجہ صاحب، کرتارپور صاحب اور لاہور میں واقع ڈیرہ صاحب سمیت اہم مقدس مقامات کا دورہ کریں گے۔ اس دوران، وہ مذہبی عقیدت کے ساتھ عبادات اور دیگر رسومات انجام دیں گے۔ اس کے علاوہ، پاکستان آنے والے یاتریوں میں برطانیہ، امریکا، یورپ، آسٹریلیا، نیوزی لینڈ، کینیڈا اور دیگر ممالک سے بھی شامل ہیں، جو سکھ مذہب سے وابستہ ہیں۔
یاد رہے کہ بیساکھی میلے کے دوران، اس سال تقریباً 5,800 سکھ یاتری پاکستان کا دورہ کر چکے ہیں، جو اس بات کا عکاس ہے کہ پاکستان سکھ مذہب کے پیروکاروں کے لیے ایک مقدس مقام کے طور پر اہمیت رکھتا ہے اور بین الاقوامی سطح پر سکھ برادری کی مذہبی اور ثقافتی تقریبات کے انعقاد کے لیے پرامن اور خوشگوار ماحول فراہم کرتا ہے۔ یہ یاتریوں کا دورہ مذہبی ہم آہنگی اور دو طرفہ محبت کا مظاہرہ ہے، جو پاکستان اور سکھ برادری کے درمیان تعلقات کو مضبوط کرتا ہے۔
