پنجاب میں ڈیجیٹل انقلاب کیلئے سیٹلائٹ انٹرنیٹ سروس متعارف کرانے کا فیصلہ

 عوام میں ڈیجیٹل ٹیکنالوجی کے استعمال کا رجحان موجود ہے‘آئندہ 4 برسوں میں 60 لاکھ نوجوانوں کو جدید ٹیکنالوجی سے جوڑنے کا منصوبہ ہے: انوشہ رحمان 
لاہور (آئی این پی )مسلم لیگ   ن  رہنما اور وزیراعلی پنجاب کی سینئر مشیر سینیٹر انوشہ رحمان نے کہا ہے کہ پنجاب میں ڈیجیٹل انقلاب کے لیے سیٹلائٹ انٹرنیٹ سروس متعارف کرانے کا فیصلہ کیا ہے۔لاہور کی نجی یونیورسٹی میں لیڈرشپ سمٹ کا انعقاد ہوا جس میں بلاک چین ٹیکنالوجی اور ڈیجیٹل اثاثوں پر تفصیلی گفتگو کی گئی۔سمٹ سے خطاب میں انوشہ رحمان نے کہا کہ پسماندہ علاقوں میں تیز رفتار انٹرنیٹ کی فراہمی پر توجہ دی جا رہی ہے، سیٹلائٹ انٹرنیٹ کے ذریعے ہر گاں، اسکول، کالج اور اسپتال تک رسائی ممکن بنائی جائے گی۔ان کا کہنا تھا کہ عوام میں ڈیجیٹل ٹیکنالوجی کے استعمال کا رجحان موجود ہے مگر سہولیات کا فقدان ہے، پنجاب میں 'کنیکٹ دی آن کنیکٹڈ' مشن کا آغاز کیا جا رہا ہے۔سینیٹر انوشہ رحمان نے بتایا کہ جلد سرکاری شعبے میں سیٹلائٹ کے ذریعے انٹرنیٹ فراہمی کا آغاز کیا جائے گا جبکہ آئی ٹی ڈپارٹمنٹ کی جانب سے جدید کنیکٹیویٹی منصوبوں پر کام جاری ہے۔