اسلام آباد: وزیرِاعظم شہباز شریف نے حالیہ دورۂ آذربائیجان کے حوالے سے جائزہ اجلاس کی صدارت کرتے ہوئے دستخط شدہ معاہدوں اور مفاہمتی یادداشتوں کو جلد عملی جامہ پہنانے کی ہدایت کی۔
اہم فیصلے:
???? تجارت کا ہدف: وزارتِ تجارت کو پاکستان اور آذربائیجان کے درمیان تجارتی حجم 2 ارب ڈالر تک لے جانے کے لیے جامع منصوبہ پیش کرنے کی ہدایت۔
???? سرمایہ کاری کمیٹی: آذربائیجان کے صدر کی جانب سے پاکستان میں 2 ارب ڈالر کی سرمایہ کاری کے اعلان پر عملدرآمد یقینی بنانے کے لیے نائب وزیرِاعظم و وزیرِخارجہ اسحاق ڈار کی نگرانی میں کمیٹی تشکیل۔
???? ترجیحی تیاری: آذربائیجان کے صدر کے آئندہ متوقع دورۂ پاکستان سے قبل تمام ضروری اقدامات مکمل کرنے کی ہدایت۔
???? ٹریڈ افسران کی تعیناتی: آذربائیجان سمیت دیگر تجارتی امکانات والے ممالک میں تجارتی افسران تعینات کرنے کی منظوری۔
پاکستان-آذربائیجان تجارتی تعلقات:
وزیرِاعظم نے کہا کہ دونوں ممالک کے درمیان دہائیوں پر محیط برادرانہ تعلقات ہیں اور وسط ایشیائی ریاستوں کے ساتھ تجارت و سرمایہ کاری کے وسیع مواقع سے فائدہ اٹھانے کے لیے ترجیحی اقدامات کیے جا رہے ہیں۔
مشترکہ بزنس فورم:
باکو میں منعقدہ بزنس فورم میں 83 پاکستانی اور 101 آذری کمپنیوں نے شرکت کی، جس کے دوران دو طرفہ تعاون کے فروغ کے لیے 13 معاہدوں اور مفاہمتی یادداشتوں پر دستخط ہوئے۔
اجلاس میں شرکت:
اجلاس میں نائب وزیرِاعظم و وزیرِخارجہ اسحاق ڈار، وفاقی وزراء احد خان چیمہ، جام کمال خان، عبدالعلیم خان، ڈاکٹر مصدق ملک، معاونِ خصوصی طارق فاطمی اور دیگر اعلیٰ حکام شریک ہوئے۔
