امریکی صدر ڈونلڈ ٹرمپ کی جانب سے دیے گئے جوتوں کے باعث امریکی وزیر خارجہ مارکو روبیو سوشل میڈیا پر توجہ کا مرکز بن گئے ہیں، جہاں ان کی تصاویر پر دلچسپ اور طنزیہ تبصروں کا سلسلہ جاری ہے۔
میڈیا رپورٹس کے مطابق ڈونلڈ ٹرمپ نے اپنے قریبی ساتھیوں اور کابینہ کے بعض ارکان کو اپنے پسندیدہ برانڈ کے سیاہ ڈریس شوز تحفے میں دیے تھے۔ تاہم مارکو روبیو کی چند حالیہ تصاویر میں یہ جوتے ان کے پاؤں کے مقابلے میں قدرے بڑے دکھائی دیے، جس کے بعد سوشل میڈیا صارفین نے اس معاملے کو مزاحیہ انداز میں زیر بحث لا لیا۔رپورٹس کے مطابق ٹرمپ اپنے قریبی حلقے کے افراد کو اکثر ایک ہی طرز کے جوتے بطور تحفہ دیتے ہیں اور بعض اوقات وہ اندازے سے سائز کا انتخاب بھی کرتے ہیں، جس کے باعث کبھی کبھار فِٹنگ کے مسائل سامنے آ جاتے ہیں۔یہ جوتے امریکی برانڈ Florsheim کے تھے، جن کی قیمت تقریباً 145 ڈالر بتائی جا رہی ہے۔
اسی طرز کے جوتے امریکی نائب صدر JD Vance سمیت ٹرمپ انتظامیہ کے کئی دیگر عہدیدار بھی استعمال کرتے ہوئے دیکھے گئے ہیں۔اس معاملے نے اس وقت مزید توجہ حاصل کی جب ایک حالیہ کانگریشنل سماعت کے دوران مارکو روبیو سے ان جوتوں سے متعلق سوال کیا گیا۔ اس پر انہوں نے برہمی کا اظہار کرتے ہوئے کہا کہ یہ سنجیدہ سماعت ہے یا “سرکس”۔سوشل میڈیا پر اس واقعے کو ایک ہلکے پھلکے سیاسی اور ذاتی ذوق کے امتزاج کے طور پر دیکھا جا رہا ہے، جبکہ بعض صارفین اسے امریکی سیاسی حلقوں میں غیر رسمی روابط کی ایک مثال قرار دے رہے ہیں۔
