فلمی دنیا سے کنارہ کشی نہیں، مگر فاصلہ کیوں؟ کنگنا رناوت کی وضاحت

بھارتی اداکارہ اور سیاستدان کنگنا رناوت نے کہا ہے کہ انہوں نے حقیقی زندگی اور عام لوگوں کے مسائل کو بہتر طور پر سمجھنے کے لیے خود کو بالی ووڈ کی چکاچوند دنیا سے کچھ حد تک الگ رکھا ہے۔

اپنی نئی فلم کی تشہیری مہم کے دوران دیے گئے ایک انٹرویو میں انہوں نے کہا کہ فلم انڈسٹری سے وابستہ افراد اکثر ایک محدود اور مصنوعی دائرے میں رہنے لگتے ہیں، جس کے باعث وہ عام زندگی کے تجربات اور زمینی حقائق سے دور ہو جاتے ہیں۔ ان کے مطابق ایک فنکار کے لیے ضروری ہے کہ وہ وقتاً فوقتاً اس دائرے سے باہر نکل کر اصل دنیا کو سمجھے۔کنگنا رناوت نے کہا کہ جب انہوں نے اپنی نئی فلم کے کردار پر کام شروع کیا تو انہیں شدت سے احساس ہوا کہ اس کردار کی بہتر ادائیگی کے لیے ضروری ہے کہ وہ فلمی ماحول سے فاصلہ اختیار کریں اور عام لوگوں کے درمیان وقت گزاریں۔انہوں نے مزید کہا کہ گزشتہ چند برسوں میں سیاست میں آنے کے بعد انہیں مختلف طبقوں کے لوگوں سے ملنے اور ان کی زندگیوں کو قریب سے دیکھنے کا موقع ملا، جس سے ان کی سوچ میں مزید وسعت آئی ہے۔

ان کے مطابق یہ تجربہ ان کی اداکاری اور کرداروں کی سمجھ بوجھ میں بھی مددگار ثابت ہوا ہے۔کنگنا رناوت نے کہا کہ اگر کوئی فنکار حقیقت سے جڑا نہ رہے تو وہ کسی بھی کردار کو پوری سچائی اور دیانت داری کے ساتھ ادا نہیں کر سکتا، چاہے وہ خود کو کتنا ہی باصلاحیت کیوں نہ سمجھتا ہو۔انہوں نے بتایا کہ وہ اپنی نئی فلم کے کردار کے لیے خصوصی تیاری کر رہی ہیں تاکہ کردار کی نفسیات اور حقیقی زندگی کے قریب تر ہو سکیں۔واضح رہے کہ کنگنا رناوت کی نئی فلم ’بھارت بھاگیہ ودھاتا‘ 12 جون کو دنیا بھر میں ریلیز کی جائے گی۔