مانسہرہ اور گردونواح میں ہلکی بارش کے بعد موسم خوشگوار ہوگیا ہے، جس سے گرمی کی شدت میں واضح کمی ریکارڈ کی گئی ہے۔
مقامی رپورٹوں کے مطابق بارش کا سلسلہ صرف مانسہرہ تک محدود نہیں رہا بلکہ بالاکوٹ، وادی کاغان اور ملحقہ پہاڑی علاقوں میں بھی وقفے وقفے سے بارش جاری رہی، جس کے باعث درجہ حرارت میں کمی اور موسم میں خوشگوار تبدیلی محسوس کی گئی۔تاہم موسلا دھار بارشوں کے بعد بالائی علاقوں میں لینڈ سلائیڈنگ اور فلیش فلڈنگ کے خدشات بھی بڑھ گئے ہیں۔ پہاڑی ڈھلوانوں اور برساتی نالوں میں پانی کے بہاؤ میں اضافے کے باعث بعض حساس مقامات پر خطرے کی صورتحال پیدا ہوگئی ہے۔ضلعی انتظامیہ مانسہرہ اور متعلقہ اداروں نے سیاحوں اور مقامی افراد کو احتیاطی تدابیر اختیار کرنے کی ہدایت جاری کی ہے۔
حکام نے خاص طور پر بارش کے دوران پہاڑی اور لینڈ سلائیڈنگ کے خطرے والے راستوں پر غیر ضروری سفر سے گریز کرنے کا کہا ہے۔اس کے ساتھ ساتھ شہریوں اور سیاحوں کو دریاؤں، ندی نالوں اور برساتی گزرگاہوں کے قریب جانے سے بھی سختی سے منع کیا گیا ہے تاکہ کسی بھی ممکنہ حادثے سے بچا جا سکے۔محکمہ موسمیات اور مقامی انتظامیہ نے صورتحال پر نظر رکھنے اور ضرورت پڑنے پر فوری اقدامات کرنے کی ہدایت جاری کی ہے۔
