کولمبیا کے جنوب مغربی علاقے میں پین امریکن ہائی وے پر ایک افسوسناک حادثہ پیش آیا، جس میں سیاحوں کی بس 160 فٹ گہری کھائی میں جا گری۔
یہ حادثہ اس وقت ہوا جب بس شہر کیلی سے ایکواڈور کی سرحد کی طرف جا رہی تھی۔حادثے میں 13 افراد ہلاک ہوگئے جبکہ 28 دیگر زخمی ہو گئے ہیں۔ زخمیوں کو فوری طور پر قریبی اسپتال منتقل کر دیا گیا جہاں ان کی حالت کا جائزہ لیا جا رہا ہے۔کولمبیا کی ٹریفک پولیس نے بس میں سوار 42 مسافروں کی تفصیلات جمع کر لی ہیں اور واقعہ کی تحقیقات شروع کر دی ہیں۔ پولیس نے بتایا کہ حادثے کی وجوہات جاننے کے لیے تحقیقات کی جا رہی ہیں۔
کولمبیئن وزیرِ ٹرانسپورٹ ماریا کونسٹانزا گارشیا نے مرنے والوں کے لواحقین سے گہرے دکھ کا اظہار کیا اور اس حادثے کے متاثرین کے ساتھ اظہار ہمدردی کیا۔ حکام نے مزید کہا کہ حادثے کی تحقیقات جاری ہیں تاکہ اس کے اسباب کا پتہ چل سکے۔یہ حادثہ اس وقت پیش آیا جب بس ایک گھومتی ہوئی سڑک پر اپنے سفر پر تھی، جس کے دوران بس کا توازن خراب ہوا اور وہ کھائی میں جا گری۔
