قومی کرکٹ ٹیم کے جارح مزاج اوپنر فخر زمان نے ٹی ٹوئنٹی انٹرنیشنل کرکٹ میں ایک اور اہم سنگ میل عبور کرلیا ہے۔
تفصیلات کے مطابق فخر زمان نے پاکستان کی جانب سے اپنا 100واں ٹی ٹوئنٹی انٹرنیشنل میچ افغانستان کے خلاف شارجہ میں جاری سہ فریقی سیریز کے دوران کھیل کر ایک منفرد اعزاز حاصل کیا۔ اس طرح وہ پاکستان کی طرف سے 100 یا اس سے زائد ٹی ٹوئنٹی میچز کھیلنے والے چھٹے کرکٹر بن گئے ہیں۔فخر زمان نے اپنا ٹی ٹوئنٹی کیریئر 2017 میں ویسٹ انڈیز کے خلاف ڈیبیو سے شروع کیا تھا، اور اس دوران وہ اپنی جارحانہ بیٹنگ اور شاندار اسٹروک پلے کے باعث پاکستان ٹیم کے لیے کئی یادگار اننگز کھیل چکے ہیں۔ انہوں نے نہ صرف پاور پلے میں حریف باؤلرز پر دباؤ ڈالا بلکہ قومی ٹیم کے لیے کئی میچ جتوانے میں بھی کلیدی کردار ادا کیا۔
پاکستان کی جانب سے اب تک 100 یا اس سے زیادہ ٹی ٹوئنٹی انٹرنیشنل میچز کھیلنے والے کرکٹرز کی فہرست میں شامل ہیں:
بابر اعظم
شعیب ملک
محمد حفیظ
شاداب خان
محمد رضوان
فخر زمان
یہ سنگ میل فخر زمان کے کیریئر کی اہم کامیابی قرار دیا جا رہا ہے اور شائقین کرکٹ کی جانب سے انہیں بھرپور مبارکباد پیش کی جا رہی ہے۔
