ویب ڈیسک: خیبرپختونخوا کے سب سے بڑے اسپتال، لیڈی ریڈنگ اسپتال پشاور میں ترکیہ اور برطانیہ سے آئے ہوئے ماہر ڈاکٹروں کی ٹیم نے امراضِ قلب میں مبتلا 40 مستحق بچوں کے کامیاب مفت آپریشنز کیے۔
بین الاقوامی ٹیم کا مشن
اس انسان دوست مشن کا اہتمام برطانوی فلاحی ادارے کے تعاون سے کیا گیا، جس کے تحت ترکیہ اور برطانیہ کے ماہر سرجنز پر مشتمل 15 رکنی ٹیم پاکستان پہنچی۔ ایشیا میں اپنے فلاحی مشن کے لیے انہوں نے پاکستان اور بنگلادیش کا انتخاب کیا، جہاں امراض قلب کے مریض بچوں کو جدید طبی سہولیات کی قلت کا سامنا ہے۔
پیچیدہ کیسز، جدید مہارت
لیڈی ریڈنگ اسپتال میں کیے جانے والے آپریشنز انتہائی پیچیدہ نوعیت کے تھے، جن میں دل میں سوراخ، دل کے والوز کی خرابی اور پیدائشی نقائص شامل تھے۔بین الاقوامی ماہرین کا کہنا تھا کہ "ہم نے وہ کیسز لیے جنہیں عام حالات میں آپریٹ کرنا مشکل ہوتا ہے۔ پاکستان میں ہمیں شاندار تجربہ ملا، اور بچوں کی کامیاب سرجری سے بے حد خوشی ہوئی۔"
60 بچوں کا انتخاب، 40 کامیاب آپریشنز
اسپتال انتظامیہ کے مطابق مفت علاج کے لیے صوبے بھر سے 60 مستحق بچوں کا انتخاب کیا گیا تھا، جن میں سے 40 بچوں کی کامیابی سے اوپن ہارٹ سرجری کی گئی۔ باقی بچوں کے آپریشنز آئندہ مرحلے میں کیے جائیں گے۔انتظامیہ کے مطابق تمام آپریشنز مکمل طور پر مفت تھے، اور یہ اسپتال اور بیرونی ٹیم کی مشترکہ کاوش کا نتیجہ ہے۔
طبی ماہرین کا جذبہ اور عوامی ردعمل
برطانیہ اور ترکیہ سے آئے ڈاکٹروں کا کہنا تھا کہ "پاکستان میں نہ صرف طبی عملہ پیشہ ورانہ مہارت رکھتا ہے بلکہ عوام بھی بے حد مہمان نواز ہیں۔ ہم دوبارہ بھی یہاں آ کر خدمات فراہم کرنا چاہیں گے۔"دوسری جانب والدین اور مریض بچوں کے اہل خانہ نے ان خدمات پر بیرونی ٹیم، اسپتال انتظامیہ اور حکومت کا شکریہ ادا کیا۔
مستقبل کے لیے امید
لیڈی ریڈنگ اسپتال کے مطابق وہ مستقبل میں بھی عالمی طبی ٹیموں کے تعاون سے مفت علاج کے مشن کو جاری رکھے گا تاکہ وہ بچے جن کے والدین مہنگے علاج کے متحمل نہیں ہو سکتے، انہیں زندگی کا نیا موقع دیا جا سکے۔
