پاکستان ریل اورروڈ کے راستے تجارتی راہداریوں کیلئے تیار ہے: عبدالعلیم خان

سی پیک شاہراہوں کی ترقی میں سنگ میل ہے،وفاقی وزیر مواصلات کا ایس سی او کے وزراء سربراہ اجلاس سے خطاب
    تیانجن(یواین پی) وفاقی وزیر مواصلات عبدالعلیم خان نے اس عزم کا اظہار کیا ہے کہ پاکستان ریل روڈ اور فضائی راستوں کے ذریعے تجارت کے فروغ کے لئے کوشاں ہے اور چین، افغانستان اور ایران کے راستے تجارتی راہداریوں میں گہری دلچسپی رکھتا ہے۔بدھ کو چین میںجاری شنگھائی تعاون تنظیم کے وزراء سربراہی اجلاس میں اپنے خطاب میں انہوں نے کہا کہ سی پیک کے تحت پاکستان نے شاہراہوں کی تعمیر میں سنگ میل عبور کیا ہے، اب افغانستان اور ایران کی سرحدوں سے آگے تجارت پھیلانا چاہتے ہیں جبکہ گوادر اور کراچی کی بندرگاہیں عالمی معیار کے مطابق کارگو کے لئے فعال ہیں اور پاکستان کی تجارتی ترقی میں خنجراب کے شمالی بارڈر، گوادر اور کراچی کے ساحل شامل ہیں۔اسی طرح ازبکستان، افغانستان اور پاکستان کے مابین ریلوے کا منصوبہ خطے میں ترقی کا اہم باب ہوگا۔ وفاقی وزیر مواصلات عبدالعلیم خان کا کہنا تھا کہ پاکستان کا خنجراب سوست روڈ کو سال بھر کھلا رکھنے کا فیصلہ اہمیت کا حامل ہے،چین کے تعاون سے سلک روڈ سٹیشنوں کی مشترکہ تعمیر کی حمایت کرتے ہیں۔انہوں نے کہا کہ پاکستان ٹرانسپورٹ سسٹم کی ڈیجیٹلائزیشن پر کام کر رہا ہے جبکہ سمارٹ ٹرانسپورٹ سسٹمز کی طرف بھی تیزی سے گامزن ہیں۔