پاکستان کی چیمپیئنز ٹرافی 2025 کی کٹ کی رونمائی 7 فروری 2024 کو قذافی اسٹیڈیم لاہور کی افتتاحی تقریب کے دوران متوقع ہے۔
وزیرِ اعظم پاکستان شہباز شریف اس موقع پر مہمانِ خصوصی ہوں گے۔ اس ایونٹ کے دوران، پاکستان کرکٹ ٹیم کی چیمپیئنز ٹرافی 2025 کی کٹ کا اعلان کیا جائے گا، جو ایونٹ کی اہمیت اور کرکٹ کے شائقین کی دلچسپی کو مزید بڑھا دے گا۔آئی سی سی چیمپیئنز ٹرافی 2025 کا آغاز 19 فروری سے ہوگا اور یہ 9 مارچ تک جاری رہے گا۔ میگا ایونٹ کے میچز پاکستان کے تین مختلف شہروں لاہور، کراچی اور راولپنڈی میں کھیلے جائیں گے، جبکہ بھارتی ٹیم اپنے میچز متحدہ عرب امارات (یو اے ای) میں کھیلے گی۔ اس کے علاوہ، چیمپیئنز ٹرافی سے قبل 8 فروری سے سہ ملکی کرکٹ سیریز شروع ہو گی، جس میں پاکستان کے علاوہ نیوزی لینڈ اور جنوبی افریقا کی ٹیمیں شامل ہوں گی۔
چیمپیئنز ٹرافی کی تیاریوں میں پاکستان کرکٹ بورڈ (پی سی بی) نے تمام انتظامات مکمل کر لیے ہیں اور یہ سیریز پاکستانی کھلاڑیوں کے لیے بہترین تیاری کا موقع فراہم کرے گی۔ اس سہ ملکی سیریز کے ابتدائی میچز 8 اور 10 فروری کو لاہور کے قذافی اسٹیڈیم میں ہوں گے، جبکہ سیریز کا آخری لیگ میچ 12 فروری کو اور فائنل 14 فروری کو کراچی میں کھیلا جائے گا۔یہ ایونٹ پاکستان کرکٹ کے لئے ایک بڑے موقع کی حیثیت رکھتا ہے اور اس کی کامیاب میزبانی ملک میں کرکٹ کے کھیل کو مزید مقبول بنائے گی۔
