پاکستان اور ترکیہ کے درمیان توانائی کے شعبے میں تاریخی معاہدہ طے پا گیا ہے، جس کے تحت ترک پیٹرولیم اوورسیز کمپنی (ٹی پی او سی) نے پاکستان میں پانچ تیل کی کنٹریکٹس پر دستخط کیے ہیں۔
ان معاہدوں میں تین آف شور اور دو آن شور بلاکس شامل ہیں، جن سے مجموعی سرمایہ کاری کا حجم تقریباً 300 ملین امریکی ڈالر ہے۔ یہ معاہدہ ٹی پی او سی کے پاکستان میں تیل اور گیس کی تلاش کے شعبے میں باقاعدہ داخلے کی علامت ہے، اور یہ ملک کی معروف ای اینڈ پی کمپنیوں کے ساتھ مل کر کام کرے گی۔اس دستخط کی تقریب وزیر اعظم ہاؤس میں منعقد ہوئی، جس میں وزیراعظم شہباز شریف اور ترک وزیر توانائی و قدرتی وسائل الپارسلان بایراکتار نے شرکت کی۔ اس موقع پر، دونوں ممالک کے اعلیٰ حکام اور توانائی کے وزراء بھی موجود تھے، جو اس معاہدے کو دو طرفہ توانائی تعاون میں ایک اہم سنگ میل قرار دے رہے ہیں۔ اس معاہدے کے تحت دونوں ممالک کے مابین توانائی کے شعبے میں تعلقات مزید مضبوط ہوں گے اور پاکستان کو توانائی کے وسائل تلاش کرنے میں مدد ملے گی۔
