اسلام آباد (ویب ڈیسک): اسلام آباد ہائی کورٹ نے پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی کی 190 ملین پاؤنڈز کے کیس میں سزا معطلی کی درخواستوں کو سماعت کے لیے مقرر کر دیا ہے۔
عدالتی ذرائع کے مطابق، اسلام آباد ہائی کورٹ کا دو رکنی ڈویژن بینچ 8 مئی کو ان درخواستوں پر سماعت کرے گا۔ ڈویژن بینچ میں قائم مقام چیف جسٹس جسٹس سرفراز ڈوگر اور جسٹس محمد آصف شامل ہوں گے۔یاد رہے کہ سابق وزیراعظم عمران خان اور ان کی اہلیہ کو 190 ملین پاؤنڈز کیس میں نیب ریفرنس کے تحت سزا سنائی گئی تھی، جس کے خلاف انہوں نے سزا معطلی اور ضمانت پر رہائی کے لیے عدالت سے رجوع کیا ہے۔
عدالت نے یہ درخواستیں آفس کی جانب سے اٹھائے گئے اعتراضات کے ساتھ سماعت کے لیے مقرر کی ہیں، جس کا مطلب ہے کہ سماعت کے دوران ان اعتراضات پر بھی بحث کی جائے گی۔عمران خان کے وکلاء نے عدالت سے استدعا کی ہے کہ سزا کو معطل کیا جائے تاکہ ان کے موکل کو ضمانت پر رہا کیا جا سکے۔ کیس کی آئندہ سماعت میں یہ واضح ہوگا کہ آیا عدالت سزا معطلی کی درخواست پر عبوری ریلیف دیتی ہے یا نہیں۔
