ممبئی: بھارت کے شہر ممبئی کے ساحلی علاقے باندرہ میں 26 فٹ لمبا ہمپ بیک وہیل کا بچہ ساحل پر پھنس جانے کے بعد ہلاک ہو گیا۔
حکام اور جنگلی حیات کے ماہرین نے اسے بچانے کی بھرپور کوشش کی، تاہم وہیل کو زندہ نہ بچایا جا سکا۔بھارتی میڈیا رپورٹس کے مطابق واقعہ باندرہ کی ساحلی پٹی پر پیش آیا، جہاں مقامی افراد نے وہیل کے بچے کو ساحل پر پھنسا ہوا دیکھا اور فوری طور پر متعلقہ حکام کو اطلاع دی۔اطلاع ملتے ہی محکمہ جنگلات، شہری انتظامیہ، سمندری حیات کے ماہرین اور ویٹرنری ڈاکٹروں پر مشتمل ریسکیو ٹیمیں موقع پر پہنچ گئیں۔ کئی گھنٹوں تک جاری رہنے والی کارروائی کے دوران وہیل کو دوبارہ گہرے پانی میں منتقل کرنے کی کوشش کی گئی۔حکام کے مطابق ریسکیو ٹیموں نے تمام ممکنہ اقدامات کیے، تاہم وہیل کی حالت انتہائی نازک ہونے کے باعث اسے بچایا نہ جا سکا اور وہ دم توڑ گئی۔بعد ازاں بھارتی وائلڈ لائف پروٹیکشن ایکٹ کے تحت مقررہ ضابطوں کے مطابق وہیل کی باقیات کا معائنہ کیا گیا، جس کے بعد اسے باقاعدہ طور پر دفن کر دیا گیا۔
ماہرین کے مطابق وہیل کے ساحل پر پھنسنے کی متعدد ممکنہ وجوہات ہو سکتی ہیں، جن میں سمندری لہروں کے رخ میں تبدیلی، بیماری، زخمی ہونا، سمندری آلودگی یا نیویگیشن میں خرابی شامل ہیں۔ حکام نے واقعے کی تحقیقات شروع کر دی ہیں تاکہ وہیل کی ہلاکت کی اصل وجہ کا تعین کیا جا سکے۔جنگلی حیات کے ماہرین کا کہنا ہے کہ موسمیاتی تبدیلی، سمندری آلودگی اور انسانی سرگرمیوں کے باعث دنیا کے مختلف ساحلی علاقوں میں وہیل اور دیگر بڑے سمندری جانوروں کے ساحل پر پھنسنے کے واقعات میں اضافہ دیکھنے میں آ رہا ہے۔
