وزیر اطلاعات پنجاب عظمی بخاری نے کہا ہے کہ پنجاب حکومت کا ستھرا پنجاب پروگرام نہ صرف پاکستان بلکہ دنیا بھر میں اپنی منفرد پہچان بنا چکا ہے۔
عظمی بخاری کے مطابق پنجاب کی صفائی کے اقدامات دوسرے صوبوں کے لیے بھی ماڈل بن چکے ہیں، اور سندھ حکومت اس پروگرام سے استفادہ کرنا چاہتی ہے۔ انہوں نے بتایا کہ پنجاب حکومت نے کوڑے کو زیر استعمال لا کر بائیو گیس پر پائلٹ پروجیکٹ بھی شروع کیا ہے۔وزیر اطلاعات نے کہا کہ خیبر پختونخوا حکومت بھی ستھرا پنجاب ماڈل سے رہنمائی حاصل کرنا چاہتی ہے، اور صوبے کے چیف سیکرٹری نے پروگرام کی تفصیلات مانگی ہیں۔ علاوہ ازیں، پنجاب حکومت نے برطانیہ کے شہر برمنگھم کو بھی اس پروگرام میں رہنمائی فراہم کی ہے۔
عظمی بخاری نے کہا کہ وزیراعلیٰ پنجاب مریم نواز پہلے ہی واضح کر چکی ہیں کہ اگر کسی صوبے کو پنجاب کے کسی بھی اچھے منصوبے کی فیزیبلٹی چاہیے تو پنجاب ہر طرح سے مدد کے لیے حاضر ہے۔ انہوں نے مزید کہا کہ پنجاب کے تجاوزات کے خلاف آپریشن، ماڈل ویلج پروگرام اور پنجاب ڈویلپمنٹ پلان بھی کامیاب پروگرام ہیں۔وزیر اطلاعات نے زور دیا کہ سیاسی تلخیاں اور الزام تراشی کی بجائے، تمام صوبوں کو ایک دوسرے کے تجربات سے سیکھنا چاہیے تاکہ سب صوبے صاف ستھرا اور بہتر سہولیات سے مستفید ہو سکیں۔
