سربراہ پاک فضائیہ ایئر چیف مارشل ظہیر احمد بابر سدھو نے اپنے خطاب میں پاکستان کی فضائیہ کی حالیہ کامیابیوں اور دفاعی صلاحیتوں کا بھرپور اعتراف کیا۔
انہوں نے کہا کہ قوم اور مسلح افواج نے دشمن کو عددی برتری کے باوجود شکست دی، اور یہ معرکۂ حق اللہ تعالیٰ کی خصوصی رحمتوں اور قوم کی غیر متزلزل عزم کا نتیجہ ہے۔انہوں نے پی اے ایف اکیڈمی اصغر خان رسالپور میں گریجویشن پریڈ کی تقریب سے خطاب کرتے ہوئے بتایا کہ پاکستان ایئرفورس نے 6 اور 7 مئی کو بھارتی جارحیت کا منہ توڑ جواب دیا، اور 10 مئی کو دشمن کے دفاعی نظام کو کامیابی سے نشانہ بنایا۔ایئر چیف نے زور دیا کہ دشمن کے سب سے جدید طیارے مار گرائے گئے اور پاکستان کی فضائیہ نے اپنی بہترین کارکردگی کا مظاہرہ کیا۔ انہوں نے کہا کہ یہ فتح، پاکستان فضائیہ کی مؤثر، متوازن اور حکمت عملی سے بھرپور آپریشنز کا نتیجہ ہے، اور یہ معرکہ تینوں افواج کی ہم آہنگی اور قیادت کے فیصلوں کا ثمر ہے۔ظہیر احمد بابر سدھو نے عالمی سطح پر فضائی طاقت کے استعمال کی جرات مندانہ مثال قائم کرنے پر پاکستان کی فضائیہ کو سراہا، اور کہا کہ حالیہ تصادم نے جدید دور کی فضائی لڑائی کی اہمیت کو واضح کیا ہے۔ انہوں نے بتایا کہ پاکستان نے اپنی آپریشنل حکمت عملی کو جدید تصورات اور جنگی حکمت عملی کے مطابق ترتیب دیا ہے۔
انہوں نے اس عزم کا اعادہ کیا کہ پاکستان کا مقصد امن قائم رکھنا ہے، اور ملک کی خودمختاری کو کسی بھی صورت میں چیلنج کیا گیا تو پاک فضائیہ سخت جواب دینے کے لیے تیار ہے۔ انہوں نے کہا کہ پاکستان ایک ذمہ دار جوہری طاقت ہے اور علاقائی و عالمی طاقتوں کے ساتھ اپنے تعلقات کو مضبوط بنانا جاری رکھے گا۔ایئر چیف نے پاکستان کی فضائیہ کی جدت طرازی اور جدید ٹیکنالوجیز کے انڈکشن پروگرام کی تعریف کی، اور کہا کہ یہ سب کچھ مادرِ وطن کے دفاع کے مقدس فرض کو انجام دینے کے لیے کیا گیا ہے۔ انہوں نے سعودی کیڈٹس کو بھی پاسنگ آؤٹ پر مبارکباد دی اور اس بات پر زور دیا کہ دونوں ممالک کے فوجی تعلقات اور دوستی کی علامت ہیں۔آخر میں، انہوں نے پاکستان فضائیہ کے ہر فرد کو ان کے پیشہ وارانہ کردار، سخت محنت اور حب الوطنی پر خراجِ تحسین پیش کیا، اور کہا کہ پاک فضائیہ نے تمام فوجی قوتوں کے ساتھ مل کر بہادری اور ہم آہنگی سے ملک کا دفاع کیا ہے۔
