صدرِ مملکت آصف علی زرداری نے یومِ اتحادِ عرب، یعنی متحدہ عرب امارات کے قومی دن کے موقع پر ایک پیغام جاری کیا ہے، جس میں انہوں نے دونوں ممالک کے درمیان تاریخی برادرانہ تعلقات کو سراہا اور انہیں مزید مضبوط بنانے کے عزم کا اظہار کیا ہے۔
انہوں نے کہا کہ پاکستان اور یو اے ای کے تعلقات مشترکہ مذہب، اعتماد اور نسل در نسل قائم رشتوں پر مبنی ہیں، اور یہ تعلقات بہت دیرینہ اور گرم جوش ہیں۔ صدر زرداری نے یہ بھی بتایا کہ پاکستان کو فخر ہے کہ وہ 1971 میں یو اے ای کو تسلیم کرنے والا پہلا ملک تھا، جو دونوں کے تعلقات کی گہرائی اور تاریخ کو ظاہر کرتا ہے۔انہوں نے اس موقع پر اماراتی قیادت کے ساتھ تعلقات کو مثالی قرار دیا اور کہا کہ تجارتی، سرمایہ کاری اور دفاعی شعبوں میں تعاون مزید بڑھنے کی توقع ہے۔ صدر نے اس بات پر بھی زور دیا کہ پاکستانی کمیونٹی یو اے ای میں دونوں ممالک کے درمیان ایک مضبوط پل کا کردار ادا کر رہی ہے، اور پاکستان امن، ترقی اور خوشحالی کے لیے دعاگو ہے۔
مزید برآں، انہوں نے بتایا کہ ان کے خاندان کا یو اے ای سے خاص تعلق ہے، کیونکہ چار نسلوں سے ان کا خاندان اس خطے سے وابستہ ہے۔ بیگم نصرت بھٹو نے اپنی آخری ایام یو اے ای میں گزارے، شہید بینظیر بھٹو نے مشکل وقت میں جلاوطنی کاٹی، اور ان کی بیٹی آج یو اے ای کو اپنا گھر بنا چکی ہے۔صدر زرداری نے اس عزم کا اظہار کیا کہ پاکستان یو اے ای کے ساتھ اپنی شراکت داری کو مزید گہرا اور مضبوط بنانے کا خواہاں ہے، اور دونوں ممالک کے درمیان تعلقات کو نئی بلندیاں دینے کے لیے پُر عزم ہیں۔
