وزیراعلیٰ مریم نواز نے خراب انجن اور زیادہ دھواں چھوڑنے والی گاڑیوں کے روٹ پرمٹ منسوخ کرنے اور ایسی گاڑیوں کو سڑکوں سے غائب کرنے کی ہدایت کی ہے۔
یہ اقدامات "اینٹی سموگ مہم" کے تحت کیے جا رہے ہیں۔ پنجاب کی سینیئر صوبائی وزیر، مریم اورنگزیب نے اس حوالے سے تفصیلات فراہم کیں۔مریم اورنگزیب نے بتایا کہ لودھراں، اوکاڑہ، وہاڑی اور سرگودھا میں چھ بھٹے بھی مسمار کیے گئے ہیں۔ مزید یہ کہ تین صنعتی یونٹس، ایک اسٹیل رولنگ مل، ایک ٹیکسٹائل یونٹ اور ایک چاول مل کو بند کر کے سیل کر دیا گیا ہے۔ خراب انجن والی اور زیادہ دھواں چھوڑنے والی ایک ہزار سے زائد گاڑیوں کی پڑتال کی گئی، جن میں سے 144 گاڑیاں بند کر دی گئیں۔ اس کے علاوہ، 64 ریت کی ٹرالیاں جو ترپال کے بغیر ریت کی ترسیل کر رہی تھیں، بند کر دی گئیں۔یہ اقدامات ہوا کی آلودگی کو کم کرنے اور سموگ کی روک تھام کے لیے کیے گئے ہیں، تاکہ ماحول کو صاف رکھا جا سکے اور شہریوں کی صحت پر منفی اثرات کو کم کیا جا سکے۔
